თუ პირდაპირი გაგებით ვიხილავთ, რომ სალომე ზურაბიშვილი ხელებით ჩაებღაუჭება თავის სავარძელს, ამას ქართული საზოგადოებისგან დაცინვის გარდა არაფერი მოჰყვება, -ამის შესახებ პარლამენტის თავმჯდომარე შალვა პაპუაშვილმა ჟურნალისტებთან პრეზიდენტი სალომე ზურაბიშვილის მიერ პრეზიდენტის სასახლის დატოვებაზე საუბრისას განაცხადა.

მისი ვარაუდით, სალომე ზურაბიშვილი და მისი მრჩეველი მსგავს ნაბიჯს არ გადადგამენ.

„ეს უკვე სასაცილო თემად არის ქცეული. არ ვიცი, საზოგადოებას გვექნება თუ არა იმისი შესაძლებლობა, რომ პირველად ვნახოთ ისტორიაში რეალიზებული ხატოვანი გამოთქმა, რომ „ვიღაც თავის სკამს ჩაებღაუჭა“. თუ პირდაპირი გაგებით ვნახავთ, რომ სალომე ზურაბიშვილი ხელებით ჩაებღაუჭება თავის სავარძელს, ამას ქართული საზოგადოებისგან გარდა დაცინვისა, არაფერი მოჰყვება. მაგრამ მე არ მგონია, რომ ასეთ ნაბიჯზე წავიდეს ან ქალბატონი სალომე და ან მისი მრჩეველი. ყველა ხვდება, რომ ქართულ საზოგადოებას სახელმწიფოს წინ რადიკალური ექსტრემისტები ვერ დაუდგებიან“, - განაცხადა პარლამენტის თავმჯდომარემ.

გარდა ამისა, პაპუაშვილმა ისაუბრა სალომე ზურაბიშვილთან მიმდინარე ოპოზიციის კონსულტაციებზე და აღნიშნა, რომ ეს არის ექსტრემიზმის შემოტანის ნაწილი, „რასაც ჭარბად ვხედავთ.“

„სალომე ზურაბიშვილი და რადიკალური ოპოზიცია საუბრობს - საქართველოს ქარავანი კი წინ მიდის. ასე რომ, თუ საკუთარი თავის გართობისთვის უნდათ, რომ დრო დააკავონ, ეს მათი ნებაა, მაგრამ ამას რაიმე რელევანტურობა ქართველი საზოგადოებისთვის არ აქვს. ეს არის ნაწილი ექსტრემიზმის შემოტანისა, რასაც ჭარბად ვხედავთ. არის მართული პროცესი გარედან. ვნახეთ საქართველოში პარლამენტის წინ მდგომი უცხოელი პოლიტიკოსები, რომლებიც პირდაპირ მოუწოდებდნენ სალომე ზურაბიშვილს და რადიკალურ ოპოზიციას, მაიდანის სცენარზე გადართულიყვნენ“, - განაცხადა პაპუაშვილმა.