ივანიშვილი დღეიდან უკვე ოფიციალურად მოკვეთილია ცივილიზებული სამყაროდან - ის დასანქცირებულია დოკუმენტურად და ყველაზე სამარცხვინო მუხლით, - ამის შესახებ „ძლიერი საქართველოს“ ლიდერი, მამუკა ხაზარაძე სოციალურ ქსელში წერს და აშშ-ის სახაზინო დეპარტამენტის მიერ „ქართული ოცნების“ საპატიო თავმჯდომარის, ბიძინა ივანიშვილის დასანქცირებას ეხმაურება.

მამუკა ხაზარაძის განცხადებით, სამარცხვინოა, როცა მეგობარი ქვეყანა გასანქცირებს რუსეთის ინტერესების გატარებისთვის საქართველოში.

„რა თქმა უნდა, ფინანსური და აქტივების თვალსაზრისით ეს სერიოზული დარტყმაა, მაგრამ სამარცხვინოა, როცა გასანქცირებს პარტნიორი ქვეყანა იმის გამო, რომ შენ ხარ რუსეთის ინტერესების გამტარებელი საქართველოში და ქვეყნის განვითარებას, მის ევროატლანტიკურ მისწრაფებას უშლი ხელს და მის კონსტიტუციას არღვევ!

რუსმა ოლიგარქმა ის მიიღო რაც ეკუთვნოდა! ეს მოსალოდნელი და გარდაუვალი იყო! ახლა კი ქართველი ხალხი მიიღებს ახალ არჩევნებს და გამარჯვებას! - იმას, რაც მას ეკუთვნის!“, - წერს მამუკა ხაზარაძე.

ცნობისთვის, აშშ-ის სახაზინო დეპარტამენტმა „ქართული ოცნების“ საპატიო თავმჯდომარეს, ბიძინა ივანიშვილს სანქციები დაუწესა. ამის შესახებ განცხადებას აშშ-ის სახაზინო დეპარტამენტის უცხოური აქტივების კონტროლის ოფისი (OFAC) ავრცელებს.

განცხადების თანახმად, "როგორც რუსეთთან დაკავშირებულ პირზე, ბიძინა ივანიშვილზე და მის მიერ კონტროლირებულ კომპანიებზე სანქციების შედეგად რიგი შეზღუდვები წესდება. შეზღუდვები ვრცელდება ყველა ტრანზაქციაში, რომელშიც ივანიშვილის მფლობელობაში მყოფი ნებისმიერი კომპანია მიიღებს მონაწილეობას, მიუხედავად იმისა ის მას პირდაპირ თუ არაპირდაპირ აკონტროლებს, ინდივიდუალურად თუ ჯგუფურად, 50%-ს თუ მეტს".

ამასთან, როგორც აშშ-ის სახელმწიფო მდივანი, ენტონი ბლინკენი აცხადებს, „შეერთებული შტატები ასანქცირებს ბიძინა ივანიშვილს, საქართველოს მმართველი პარტიის, „ქართული ოცნების" დამაარსებელსა და საპატიო თავმჯდომარეს რუსეთის ფედერაციის სასარგებლოდ საქართველოს დემოკრატიისა და ევროატლანტიკური მომავლის ძირის გამოთხრისთვის".

„ბიძინა ივანიშვილი სანქცირებულია აღმასრულებელი ბრძანება №14024 მუხლი 1(a)(ii)(C)-ის საფუძველზე, ვინაიდან ის არის პასუხისმგებელი ან თანამონაწილე, ან პირდაპირ თუ ირიბად ჩართული, ან მცდელობა გაუწევია ისეთი ქმედებებისა თუ პოლიტიკისთვის, რომელიც ძირს უთხრის დემოკრატიულ პროცესებს ან ინსტიტუტებს როგორც შეერთებულ შტატებში, ისე საზღვარგარეთ, რუსეთის ფედერაციის მთავრობის პირდაპირი თუ ირიბი სარგებლისთვის", - ნათქვამია განცხადებაში.