ოპოზიციას რიტორიკა იმიტომ ჰქონდა შეცვლილი, რომ სალომე ზურაბიშვილის საპრეზიდენტო სტატუსი გამოეყენებინა - ახლა ეს სტატუსი არ აქვს და ახლა ნახეთ, როგორ აირევა მათთან ურთიერთობა - ეს არის ჟურნალი, რასაც ვხედავთ, მათ რიგებში დაპირისპირების კინო წინ არის,- ამის შესახებ პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

მისი თქმით, „ჯერ სად ხართ, ოპოზიცია თავის პირველ რიტორიკას რომ დაუბრუნდება ზურაბიშვილთან დაკავშირებით, მერე ნახეთ თქვენ დაპირისპირება“.

„ჩვენ ამაზე ვსაუბრობდით, რომ ოპოზიციის მიერ სალომე ზურაბიშვილის სტატუსის გამოყენება ხდებოდა. ეს ის ოპოზიციაა, რომლის ეპითეტებიც გვახსოვს ქალბატონი სალომეს მიმართ. არა მხოლოდ ეპითეტები, რომლებიც ყველანაირ ეთიკურ ზღვარს იყო გაცდენილი. ზუსტად იმ ოპოზიციის მიერ იყო სალომე ზურაბიშვილი არალეგიტიმურ პრეზიდენტად გამოცხადებული. ეს რიტორიკა იმიტომ ჰქონდათ შეცვლილი, რომ მისი საპრეზიდენტო სტატუსი გამოეყენებინათ. ახლა ეს სტატუსი არ აქვს და ახლა ნახეთ, როგორ აირევა მათთან ურთიერთობა. ეს მოსალოდნელიც იყო საბოლოოდ. ჩვენ საქმე გვაქვს არა ამ ქვეყნის პატრიოტებთან, არა ხალხთან, რომლებსაც რაღაც პოლიტიკური იდეოლოგია აქვთ, არამედ საქმე გვაქვს მარიონეტებთან, რომლებიც სხვების დაკვეთით მოქმედებენ. ამიტომ, ეს ჯერ კიდევ წინა არის. ეს არის ჟურნალი, რასაც ვხედავთ, მათ რიგებში დაპირისპირების კინო წინ არის.

ის ამბობდა, რომ დარჩებოდა, მაგრამ ვნახეთ, რომ არ დარჩა და წავიდა. პოლიტიკურ ასპარეზზე კი ბატონო, დარჩეს, ეს თავისუფალი ადამიანების თავისუფალი ქვეყანაა და ყველას შეუძლია პოლიტიკურად აქტიური იყოს. გუშინ ვნახეთ, რომ ვერ დარჩა და წავიდა“,- განაცხადა შალვა პაპუაშვილმა.

ამასთან, პაპუაშვილი გამოეხმაურა, კონგრესმენ ჯო უილსონის მიერ სალომე ზურაბიშვილის აშშ-ის პრეზიდენტის დონალდ ტრამპის ინაუგურაციაზე მიწვევას და აღნიშნა, რომ „მე რატომ უნდა მივეწვიე? მეც არავინ მომიწვევია პრეზიდენტის ინაუგურაციაზე“.

„ეს მეტყველებს იმაზე, რომ თქვენ სიცრუეს ავრცელებთ - არა დონალდ ტრამპმა, არამედ ჯო უილსონმა მიიწვია ის ინაუგურაციაზე, როგორც იცით. არ ვიცი, იქ, ალბათ, თავისებური სისტემაა ინაუგურაციაზე და ღონისძიებაზე ხალხის მიწვევისა. ამაზე რა კომენტარი უნდა გავაკეთო? მე რატომ უნდა მივეწვიე? მეც არავინ მომიწვევია პრეზიდენტის ინაუგურაციაზე“,- განაცხადა პარლამენტის თავმჯდომარემ.