საქართველოს პარლამენტის შენობასთან შეკრებილმა საპროტესტო აქციის მონაწილეებმა ოკუპირებული გალის რაიონის სოფელ საბერიოში მომხდარი ტრაგედიის შედეგად დაღუპული ბავშვების ხსოვნას პატივი მიაგეს.

მათ საკანონმდებლო ორგანოს შენობასთან აანთეს სანთლები და სიმბოლურად მიიტანეს სათამაშოები.

"საბერიო გვტკივა, თქვენთან ვართ", - ასეთი სახის წარწერაა დატოვეს აქციის მონაწილეებმა პარლამენტთან.

აქციის მონაწილეები პარლამენტთან უკვე 39-ე დღეა ყოველდღიურად იკრიბებიან. ისინი ხელახალი არჩევნების ჩატარებას და აქციაზე დაკავებულების გათავისუფლებას მოითხოვენ.

ცნობისთვის, ოკუპირებული აფხაზეთის გალის რაიონის სოფელ საბერიოში კერძო სახლში ხანძარი გაჩნდა, რასაც ხუთი ბავშვი ემსხვერპლა.