საზოგადოებრივ მაუწყებელთან საპროტესტო აქცია მიმდინარეობს.

როგორც აქციის მონაწილეები აცხადებენ, საზოგადოებრივმა მაუწყებელმა დაარღვია შეთანხმება და გააუქმა საღამოს ეთერი, რომელიც საზოგადოების წარმომადგენლებს უნდა დათმობოდა.

ადგილზე შეკრებილები საზოგადოებრივი მაუწყებლის ადმინისტრაციასთან შეხვედრას ითხოვენ.

მათივე თქმით, სამი დღეა ადმინისტრაცია კონტაქტზე არ გამოდის, ზარებსა თუ ტექსტურ შეტყობინებებს არ პასუხობენ.

„რამდენიმე დღეა ჩვენი შეთანხმების საპირისპიროდ მენეჯმენტი და მათი წარმომადგენლები, პროდიუსერები არ გამოდიან ჩვენთან კონტაქტზე, არ პასუხობენ არც ჩვენს სატელეფონო ზარებს, არც ტექსტურ შეტყობინებებს. 3 იანვარს უნდა განახლებულიყო საღამოს ეთერი და დრო უნდა დათმობდა საზოგადოების წარმომადგენლებს, ეს დრო, 3 იანვრიდან გადაიდო 6 რიცხვამდე, თუმცა ეს ადამიანები აორთქლდნენ და კონტაქტზე არ გამოდიან. ყველაფერი ეს გვაფიქრებინებს, რომ არხმა გადაწყვიტა, საზოგადოების ხმა გაწყვიტოს და აღარ დაუთმოს დრო“, - განაცხადა აქციის ერთ-ერთმა მონაწილემ.