საპროტესტო აქციების დროს ჯგუფურ ძალადობაში მონაწილეობის ბრალდებით დაკავებულ ნიკოლოზ ჯავახიშვილის კერძო ადვოკატმა ელგუჯა ჯავახიშვილმა სახელმწიფოს ხარჯზე მოწვეული ადვოკატის, სოფიო გოგლიჩიძის აცილების შუამდგომლობა დააყენა, რაც მოსამართლე ირაკლი ხუსკივაძემ არ დააკმაყოფილა.

ხუსკივაძის განმარტებით, 8 საათია, რაც საქმეს იხილავს და დაცვის მხარე პროცესის ჩაშლისკენ და გაჭიანურებისკენაა მიმართული, ეს რომ არ განმეორდეს, ის აღნიშნულ შუამდგომლობას არ აკმაყოფილებს.

შუამდგომლობისას ავსაჯანიშვილმა განმარტა, რომ მას ნიკოლოზ ჯავახიშვილმა განუცხადა, რომ ვინაიდან კერძო ადვოკატი ჰყავს, არ სურს ის საზოგადოებრივმა ადვოკატმა დაიცვას.

ბრალდების მხარე ამ შუამდგომლობას არ დაეთანხმა, ვინაიდან, მათი განმარტებით, შეთანხმებით არსებული ადვოკატი მონაწილეობას არ იღებდა სხდომაზე.

აღნიშნულის შემდეგ ავსაჯანიშვილმა მოსამართლის აცილების შუამდგომლობა დააყენა, რის შემდეგაც სხდომათა დარბაზი ისე დატოვა, მოსამართლის პოზიცია არც მოუსმენია. მოსამართლის კითხვაზე, ისე გადიოდა, რომ შუამდგომლობაზე პასუხს, არ უსმენდა? ადვოკატმა უპასუხა, რომ "აზრი არ ჰქონდა, რადგან მაინც არ დააკმაყოფილებდა".

ამ წუთებში სხდომაზე დაკავებულების მიმართ შეფარდებული აღკვეთის ღონისძიება პატიმრობა ისინჯება.

ცნობისთვის, დაკავებულებიდან სამს - ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.

ბრალდებულებიდან ხუთს - გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ.