რამდენიმეწამიანმა დიალოგმა, ალბათ, ყველაზე კარგად აჩვენა, სად არის მონობა და სად - ქვეყნის სამსახური, - ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

შალვა პაპუაშვილი სოციალურ ქსელში განცხადებას ურთავს ბათუმში გადაღებულ ვიდეოს, რომელშიც ჩანს, რომ „კოალიცია ცვლილებისთვის“ ლიდერი ელენე ხოშტარია სამართალდამცველს მიმართავს: „კანონი თქვენ გეუბნებათ, რომ ევროპას უნდა ემსახუროთ, რადგან კონსტიტუციის 78-ე მუხლშია ჩაწერილი“, რაზეც პოლიციელი პასუხობს: „მე უნდა ვემსახურო ჩემს ქვეყანას“.

„ამ რამდენიმეწამიანმა დიალოგმა, ალბათ, ყველაზე კარგად აჩვენა, სად არის მონობა და სად - ქვეყნის სამსახური.

სინამდვილეში ხომ ეს არის, რაზეც ჩვენ და ეს მარგინალები ვერ ვთანხმდებით”, - წერს შალვა პაპუაშვილი.