რამდენიმე მოსალოდნელი სცენარია - იმ შემთხვევაში, თუ ინიშნება არჩევნები, როგორი მომზადებით უნდა შევხვდეთ, - ამის შესახებ იურისტმა, პარლამენტის ყოფილმა ვიცე-სპიკერმა, თამარ ჩუგოშვილმა საქართველოს მეხუთე პრეზიდენტთან სალომე ზურაბიშვილთან შეხვედრის შემდეგ მედიას განუცხადა.

ჩუგოშვილის თქმით, ის ამ ეტაპზე კონკრეტიკისგან თავს შეიკავებს, რადგან შეხვედრაზე მხარეებმა მხოლოდ საკუთარი მოსაზრებები გაცვალეს.

"რამდენიმე მნიშვნელოვანი საკითხი, რომელზეც საუბარი დავიწყეთ, მათ შორის, გარკვეული პერიოდის წინ და ამაში საიდუმლო არაფერია - რამდენიმე მოსალოდნელი სცენარია. იმ შემთხვევაში, თუ ინიშნება არჩევნები, როგორი მომზადებით უნდა შევხვდეთ ქვეყანა ამ სიტუაციას. იმ შემთხვევაში, თუ ხანგრძლივად გრძელდება ის პროტესტი და ის ვითარება, რომელშიც ვართ, პოლიტიკურად როგორ უნდა შევხვდეთ ამ ყველაფერს მომზადებული.

ამ ეტაპზე ვერანაირ კონკრეტიკას ვერ გაგიზიარებთ, აზრების გაცვლა-გამოცვლა იყო უფრო მეტად", - განაცხადა თამარ ჩუგოშვილმა.