დრონებით თავდასხმის შედეგად რუსეთის ტულისა და კალუგის ოლქებში მდებარე ნავთობსაცავებს ხანძარი გაუჩნდა, - ამის შესახებ ინფორმაციას რუსეთის ოლქების გუბერნატორები ავრცელებენ.

ტულის ოლქის გუბერნატორის, დიმიტრი მილაევის ცნობით, ხანძარი საწვავის ერთ-ერთ ავზს გაუჩნდა.

„დღეს ღამით ტულის ოლქს კიევის რეჟიმი თავს დაესხა. საჰაერო თავდაცვის სისტემებმა 5 დრონი ჩამოაგდო“, - წერს გუბერნატორი „ტელეგრამის“ არხზე.

დრონებით თავდასხმის შესახებ ინფორმაციას კალუგის ოლქის გუბერნატორი, ვლადისლავ შაფშაც ავრცელებს.

„ქალაქ ლიუდინოვოში, დრონით თავდასხმის შედეგად, სამრეწველო საწარმოს ტერიტორიაზე ხანძარი გაჩნდა“, - აცხადებს კალუგის ოლქის გუბერნატორი.

ამასთან, რუსეთის თავდაცვის სამინისტროს ინფორმაციით, ქვეყნის ტერიტორიაზე 46 უკრაინული დრონი ჩამოაგდეს.