თათრეთის რესპუბლიკის ქალაქ ყაზანში უკრაინული უპილოტო საფრენი აპარატებით შეტევა განხორციელდა, მიმდინარეობს შედეგების აღმოფხვრა, - ინფორმაციას რუსული მედია ავრცელებს.

მათივე ინფორმაციით, მოწინააღმდეგის სამიზნე სამრეწველო საწარმოები იყო, თუმცა, ყველა დრონი განეიტრალდა და მსხვერპლი და დაზიანება არ ყოფილა.

„საგანგებო სიტუაციების სამსახურები აგრძელებენ ადგილზე მუშაობას შედეგების აღმოსაფხვრელად. პირველი შეტყობინებების მიღების შემდეგ შემთხვევის ადგილზე მივიდა რესპუბლიკის ხელმძღვანელი, რუსტამ მინიხანოვი. ყველა საწარმო ჩვეულ რეჟიმში მუშაობს“, - ნათქვამია თათრეთის რესპუბლიკის ხელმძღვანელის პრესსამსახურის განცხადებაში.

ამასთან, „როსავიაციის“ წარმომადგენლის, არტემ კორენიაკოს ინფორმაციით, ყაზანის აეროპორტში, ფრენების უსაფრთხოების უზრუნველსაყოფად, თვითმფრინავების მიღებასა და გაგზავნაზე შეზღუდვები დაწესდა.

ცნობისთვის, რუსეთის თავდაცვის სამინისტროს ცნობით, გასული ღამის განმავლობაში რუსეთის საჰაერო თავდაცვის სისტემებმა ქვეყნის რეგიონებში 31 უკრაინული დრონი ჩამოაგდეს.