რეალურად, ამის ალბათობა საკმაოდ მაღალია, თუმცა ამაში ვერაფერ განსაკუთრებულს ვერ ვხედავ - ეს არის ტექნიკური საკითხი, ევროკავშირში შეგვიძლია ვიზითაც გავემგზავროთ და შეგვიძლია უვიზოდაც,- ამის შესახებ პრემიერ-მინისტრმა, ირაკლი კობახიძემ აბუ-დაბიში ჟურნალისტებს დიპლომატიური პასპორტების შესაძლო გაუქმებასთან დაკავშირებით განუცხადა.

კობახიძის თქმით, „ქართული ოცნებისთვის“ მნიშვნელოვანია, ქვეყანას და ქართველი ხალხის ინტერესებს არ შეექმნას საფრთხე“.

„რეალურად, ამის ალბათობა საკმაოდ მაღალია, ასე შევაფასებდი, თუმცა ამაში ვერაფერ განსაკუთრებულს ვერ ვხედავ. მხოლოდ და მხოლოდ ტექნიკური, სიმბოლური საკითხია ეს ყველაფერი. ჩვენთვის მთავარია, რომ ქვეყანაში მშვიდობასა და საზოგადოების, ჩვენი ხალხის ინტერესებს არ შეექმნას საფრთხე. რაც შეეხება იმას, ვიღაც ვიზას მოითხოვს საჯარო სამსახურში თუ არ მოითხოვს, ეს არის ტექნიკური საკითხი. ევროკავშირში შეგვიძლია ვიზითაც გავემგზავროთ და შეგვიძლია უვიზოდაც. ამას არავითარი არსებითი მნიშვნელობა არ აქვს. არსებითი მნიშვნელობა აქვს, მხოლოდ და მხოლოდ იმას, რომ ჩვენს ქვეყანას კვლავაც უნდა შევუნარჩუნოთ მშვიდობა და უნდა დავიცვათ ჩვენი ხალხის ძირეული ინტერესები“, - განაცხადა ირაკლი კობახიძემ.

ამასთან, კობახიძის თქმით, დიპლომატიური პასპორტის მქონე პირებისთვის შესაძლო უვიზო რეჟიმის გაუქმებაზე საუბარი „სამწუხარო მოვლენების გაგრძელება“.

„ეს არის სამწუხარო მოვლენების გაგრძელება. საუბარია მუდმივად შანტაჟზე ჩვენი ქვეყნის წინააღმდეგ. ეს შანტაჟი არ იყო ეფექტიანი გასული 4 წლის განმავლობაში და ვერ იქნება ეფექტიანი ვერც ახლა. ეს არის ერთადერთი, რაც შემიძლია ვთქვა ამასთან დაკავშირებით. თავისთავად ასეთი დისკუსიები უკვე წარმოაჩენს იმ პრობლემებს, რომლის წინაშეც დგას დღეს ევროკავშირი. ძალიან დიდი იმედი გვაქვს, რომ ევროკავშირი მალე შეძლებს ამ პრობლემების დაძლევას“,- აცხადებს ირაკლი კობახიძე.