რუსეთის ნიჟნი-ნოვგოროდის ოლქის ქალაქ ქსტოვოში მდებარე „ლუკოილის“ ნავთობსაცავზე თავდასხმა უკრაინის თავდაცვის სამინისტროს მთავარი სადაზვერვო სამმართველოს დრონებით განხორციელდა, - ინფორმაციას უკრაინული მედია ავრცელებს.

წყაროებმა, სადაზვერვო სამმართველოდან, მედიასთან საუბარში განაცხადეს, რომ ობიექტს, რომელიც რუსული საოკუპაციო ძალების საქმიანობის მხარდამჭერია, ადგილობრივი დროით შუაღამისას დაარტყეს.

ქსტოვოს მაცხოვრებლები სოციალურ ქსელებში წერენ, რომ სულ მცირე სამი აფეთქების ხმა გაიგონეს. წყაროები, სადაზვერვო სამმართველოდან, აცხადებენ, რომ ნავთობსაცავის ტერიტორიაზე ოთხი დარტყმა მოხდა.

უკრაინის დაზვერვის მონაცემებით, თავდასხმის შედეგად ნავთობსაცავი მნიშვნელოვნად დაზიანდა და რომ მტრის ობიექტისკენ გაშვებულმა ოთხივე უპილოტო საფრენმა აპარატმა სამიზნეს მიაღწია.