ცვლილებებით ხდება დიპლომატიური სამსახურის პარტიული ინტერესებისადმი დაქვემდებარება, რაც არის ხელისუფლების უზურპაციის კიდევ ერთი მცდელობა და ინსტიტუციის ჩამოშლის მიზანმიმართული ქმედება, - ამის შესახებ „ძლიერი საქართველოს“ წევრმა ლანა გალდავამ განაცხადა, რითაც დიპლომატიური სამსახურის გავლის წესებში ცვლილებებს გამოეხმაურა.

მისი თქმით, ცვლილებების მიზანი გამოცდილი და ინსტიტუციური მეხსიერების მქონე საჯარო მოხელეების და საკადრო დიპლომატების ნეპოტისტური და კორუფციული სქემების მონაწილე უბიოგრაფიო კადრებით ჩანაცვლებაა.

„როგორც საჯარო მოხელეთა მიმართ, როდესაც ცვლილებები ემსახურებოდა მოხელეთა კლასის განადგურებას, ამ შემთხვევაშიც სიახლეები ატარებს რეპრესიულ ხასიათს და აქვს განგრძობითი ხასიათი. დიპლომატიურ თანამდებობებზე ადმინისტრაციული ხელშეკრულებების შემოტანით, პირველადი სტრუქტურული ერთეულების გაჩენით და ა.შ., ამ შემთხვევაში უკვე ხდება საკადრო დიპლომატიის ცნების განადგურება.

მიზანი არის ყველა ინსტიტუციის „ეფესბეს“ მეთოდებით, სუს-ის „ოდეერებით“ მართვა, ხოლო პროფესიონალი, გამოცდილი და ინსტიტუციური მეხსიერების მქონე საჯარო მოხელეების და საკადრო დიპლომატების ჩანაცვლება ნეპოტისტური და კორუფციული სქემების მონაწილე უბიოგრაფიო კადრებით.

ამ მძიმე ვითარებიდან გამოსავალი ერთადერთია - ჩატარდეს თავისუფალი, სამართლიანი და კონკურენტუნარიანი არჩევნები იმისთვის, რომ ქვეყანა და ინსტიტუციები გადარჩეს!“ - აცხადებს გალდავა, რომლის კომენტარსაც “ძლიერი საქართველო“ ავრცელებს.