არ მრჩება განცდა, რომ შიშის გამო ვიღაც უკან დაიხევს. პროტესტი შეუჩერებელია, - ამის შესახებ პარტია „გახარია საქართველოსთვის“ წევრმა ლევან გოგიჩაიშვილმა „პალიტრანიუსის“ გადაცემაში „პოლიტიკური სივრცე“ განაცხადა.

ლევან გოგიჩაიშვილის თქმით, ხელისუფლების პროპაგანდა ხალხს აშინებდა, თუმცა ხალხში შიში უკვე გადალახულია.

„არ მრჩება განცდა, რომ კანონების გამკაცრება პროტესტს შეაჩერებს. ორი დღე პროპაგანდა ხალხს აშინებდა და შიში გადალახული იყო, იმ დღეს ადამიანები ამ განზრახვით მივიდნენ. შიში აღქმის მომენტია და იმ მომენტში ადამიანებმა გადალახეს. არ მრჩება განცდა, რომ შიშის გამო ვიღაც უკან დაიხევს. შეუჩერებელი პროტესტია. მე ვერ ვხედავ პროტესტის გაჩერების რესურსს. არ ვამბობ, რომ ბუკვალურად ხვალ, ჩვენ რაღაცას შევცვლით, მაგრამ მე ვერ ვხედავ, იმათ რისი გაკეთება შეუძლიათ. აქეთა მხარეს რესურსი სულ გაეზრდება, ხოლო იქით მხარეს რესურსი ყოველთვის შეზღუდული იქნება. ხელისუფლების ძალადობრივი რესურსი შეზღუდულია, პოლიციური რესურსი შეზღუდულია“, - განაცხადა ლევან გოგიჩაიშვილმა.

ლევან გოგიჩაიშვილის თქმით, პოლიციის ქმედება არ არის ადეკვატური და თუკი ნიღბების უკან რეალურად პოლიციელები არიან, მაშინ კიდევ უფრო მძიმე ვითარებაა ქვეყანაში.

„აქციებზე ძალიან არა პოლიციური შეხედულების ადამიანები დგანან, მაგრამ ესენი თუ პოლიციელები არიან, მაშინ უარესია. სიტყვა პოლიცია რომ მოხსნა, ჩვეულებრივი „შპანაა“, თავის ქცევაში, დამოკიდებულებაში, უზრდელობაში. სად გაიზარდნენ? რა მაინტერესებს იცით, პოლიციაში ქალების მიმართ რამე პრობლემები აქვთ? სიძულვილს არც მალავენ, რა ჭირთ ამ ადამიანებს? სპეციალურად არჩევენ ასეთ პრობლემურ ხალხს? ველურების შთაბეჭდილებას ტოვებენ, რომ ჩაკეტავ, შემდეგ გამოუშვებ და დარბის გავეშებული. რატომ დარბოდნენ ან ხალხი რომ ტროტუარზე დგას, ხელს რატომ კრავენ? ადეკვატური ქცევა არ გააჩნიათ ამ ადამიანებს. იმედი მაქვს, რომ ვიღაც ზონდერები ჰყავთ მოყვანილი თორემ, ეს თუ ჩვენი პოლიციაა, მაშინ ჩვენ კიდევ უფრო მძიმე სიტუაციაში ვართ. ასეთი სიძულვილი ქალის მიმართ, რასაც ეს კაცუნები გამოხატავენ, ამას თუ რაღაც მძიმე ფსიქოლოგიური პრობლემები არ ახლავს, მაშინ რაღაც სხვასთან გვაქვს საქმე. თუ ეს ჩვენი რეალური პოლიციაა, მაშინ ჩვენ პოლიცია არ გვყავს, ეს არ არის პოლიცია, ეს რაღაც კოშმარია“, - განაცხადა ლევან გოგიჩაიშვილმა.