გრიგოლ გეგელია - ელჩებთან შეხვედრაზე განვიხილეთ ევროსაბჭოს რეზოლუცია და ქვეყანაში მიმდინარე ავტოკრატიული პროცესები - განვიხილეთ შემდგომი სამოქმედო ნაბიჯები, რომ სახელმწიფო დავიხსნათ რუსების მმართველობისგან
შეხვედრაზე განვიხილეთ ევროსაბჭოს რეზოლუცია და ქვეყანაში მიმდინარე ავტოკრატიული პროცესები, - ამის შესახებ კოალიცია “ძლიერი საქართველოს” ერთ-ერთმა ლიდერმა, გრიგოლ გეგელიამ საქართველოში აკრედიტებული დიპლომატიური კორპუსის წარმომადგენლებთან შეხვედრის დასრულების შემდეგ ჟურნალისტებს განუცხადა.
მისივე თქმით, შეხვედრაზე განიხილეს შემდგომი სამოქმედო ნაბიჯები.
“ჩვენ გვქონდა შეხვედრა დიპლომატიური კორპუსის წარმომადგენლებთან. ჩვენი შეხვედრის ერთ-ერთი მთავარი მიზანი იყო ევროსაბჭოს რეზოლუციის ირგვლივ საუბარი. სწორედ, ამ კონტექსტში ჩაინიშნა პირველად ჩვენი შეხვედრა, ამიტომ განვიხილეთ ევროსაბჭოს რეზოლუცია, ამავე დროს, ბუნებრივია, განვიხილეთ ქვეყანაში მიმდინარე ავტოკრატიული პროცესები - ადამიანების დაპატიმრება და დევნა პოლიტიკური ნიშნით. ფართო რეპრესიები არა თუ “ქართულ ოცნებას” დაანონსებული აქვს, არამედ უკვე აღსრულების ფაზაშია. რა თქმა უნდა, განვიხილეთ შემდგომი სამოქმედო ნაბიჯები იმისთვის, რომ ჩვენი სახელმწიფო დავიხსნათ რუსების მმართველობისგან და მივიღოთ ახალი არჩევნები, რომელშიც ყველა ჩვენი მოქალაქე თავისუფალ პირობებში გააკეთებს საკუთარ არჩევანს”, - განაცხადა გეგელიამ.
ცნობისთვის, კოალიცია „ძლიერი საქართველოს“ ოფისში, სამი ოპოზიციური კოალიციის ლიდერები საქართველოში აკრედიტებული დიპლომატიური კორპუსის წარმომადგენლებს შეხვდნენ.
