ეს მართლაც გადამწყვეტი წერტილია საქართველოს ისტორიაში - ან აღვადგინოთ ის ურთიერთობა, რაც ადრე გვქონდა ან საქართველო მართლაც აღმოსავლეთით წავა და ამ ყველაფერს აბსოლუტურად არაპროგნოზირებადი შედეგები აქვს, - ამის შესახებ ლიეტუველმა ევროპარლამენტარმა პეტრას აუსტრევიჩუსმა „ინტერპრესნიუსთან“ ექსკლუზიურ ინტერვიუში განაცხადა.

მისი თქმით, „ქართული ოცნების“ გზა აღმოსავლური გზაა და ამ ყველაფრის გავლენა ქართველი ხალხისთვის აბსოლუტურად დამანგრეველი იქნება.

„გულწრფელად რომ ვთქვა, არ მჯეროდა, რომ სიტუაცია შეიძლებოდა ასეთი ცუდი ყოფილიყო, როგორც ეს ახლა ხდება. მაგრამ, ალბათ, ჩვენ არ შევაფასეთ და არასათანადოდ შევაფასეთ „ქართული ოცნების“ ხელისუფლების გეგმები საქართველოს ევროპული გზის დასასრულებლად. ისინი მოქმედებენ განსხვავებული სცენარით, ავტორიტარული რეჟიმის სცენარით, პლურალისტური საზოგადოების გარეშე, განსხვავებული მოსაზრებების გარეშე, ძლიერი ოპოზიციის გარეშე. ეს აბსოლუტურად რუსული გზაა, აღმოსავლური გზა. ეს ძალიან ცუდი ამბავია ქართველი ხალხისთვის, რადგან ამ ყველაფრის გავლენა იქნება აბსოლუტურად დამანგრეველი და ეს უკვე ასეც არის.

შემიძლია გითხრათ, რომ „ქართულ ოცნებასთან“ ყველა ოფიციალური კონტრაქტი გავაუქმეთ. მე პირადად უკან დასახევ გზას ვერ ვხედავ. ვგულისხმობ იმ ხალხთან ერთად, რომლებიც ახლა ხელისუფლებაში არიან. მომავალ კვირას გვექნება რეზოლუცია საქართველოს შესახებ. კიდევ ერთხელ ველოდები ძალიან მკაფიო განცხადებებს. მე ნამდვილად მინდა დავინახო, [ევროკავშირის] წევრი ქვეყნები, რომლებიც მიჰყვნენ ამ ხაზს. ზოგიერთ დედაქალაქსა და თბილისს შორის არ არსებობს ინდივიდუალური მიდგომა ან განსხვავებული ურთიერთობა. ჩვენ უნდა გვესმოდეს, რომ ეს მართლაც გადამწყვეტი წერტილია საქართველოს ისტორიაში. ან აღვადგინოთ ის ურთიერთობა, რაც ადრე გვქონდა ან საქართველო მართლაც აღმოსავლეთით წავა. ამ ყველაფერს აბსოლუტურად არაპროგნოზირებადი შედეგები აქვს“,- განაცხადა აუსტრევიჩუსმა.

ამასთან, კითხვაზე, რა ნაბიჯები უნდა გადადგას „ქართულმა ოცნებამ“ ევროკავშირთან ურთიერთობის გასაუმჯობესებლად და ევროინტეგრაციის გზაზე დასაბრუნებლად, აუსტრევიჩუსი არჩევნებს ასახელებს.

„არჩევნები. ეს ძალიან საბაზისო რაღაცაა. მათ შეცდომა დაუშვეს. არჩევნების დროს იყო გაყალბება, დიდი ადმინისტრაციული რესურსის მობილიზება, ბევრი დაშინება და ძალადობაც კი გამოიყენეს დამოუკიდებელი დამკვირვებლებისა და ოპოზიციის წარმომადგენლების მიმართ. ამისთვის მათ უნდა გადაიხადონ ფასი და უნდა შეიმუშაონ გეგმა. ჩვენ ვთქვით, არაერთხელ აღვნიშნეთ ჩვენს რეზოლუციებში, რა არის გასაკეთებელი, თუმცა, არანაირი პასუხი [არ ისმის] თბილისიდან. ბურთი ახლა თბილისის მოედანზეა“, - განაცხადა აუსტრევიჩუსმა.

ინტერვიუს სრული ვერსია იხილეთ ბმულზე.