სანქციები ვერ იქნება შემაჩერებელი. როდესაც საქმე ეხება ქვეყნის ინტერესს და მომავალს, ვერანაირი სანქცია ვერ შეგვაჩერებს, სანქციების არავის ეშინია, - ამის შესახებ „ქართული ოცნების“ გენერალურმა მდივანმა, კახა კალაძემ განაცხადა, რითაც გამოეხმაურა ევროპარლამენტში 13 თებერვალს საქართველოს საკითხზე დაგეგმილი რეზოლუციის კენჭისყრას და ინფორმაციას, რომ რეზოლუცია გარკვეული პირების სანქცირებას შეეხება.

კალაძის შეფასებით, დასავლეთში კონკრეტული ბიუროკრატები გაგიჟებულები არიან, რომ მათ საქართველოში მარცხი განიცადეს.

„ჩვენ არაერთხელ გაგვიკეთებია განცხადებები იმასთან დაკავშირებით, რომ სანქციები ვერ იქნება შემაჩერებელი. როდესაც საქმე ეხება ქვეყნის ინტერესს და მომავალს, ვერანაირი სანქცია ვერ შეგვაჩერებს, სანქციების არავის ეშინია. ჩვენ ყოველთვის დავიცავთ ჩვენს ქვეყანას, ყოველთვის დავიცავთ ჩვენი ქვეყნის ინტერესებს. ის კონკრეტული კორუმპირებული, გაბოროტებული ბიუროკრატები (ყველაზე საუბარი არ მაქვს), უბრალოდ გაგიჟებულები არიან, რომ მათ განიცადეს მარცხი. ისინი დამარცხდნენ საქართველოში, ჩვენი ქვეყნის მოსახლეობის უმრავლესობამ კორუმპირებულ ევროპულ ბიუროკრატიას უთხრა - „არა“ და შესაბამისი გადაწყვეტილება მიიღო, მხარი დაუჭირა ქვეყანაში მშვიდობას, ასევე მხარი დაუჭირა იმას, რომ ქვეყანამ გააგრძელოს განვითარება, არ შეუერთდეს სანქციებს, ქვეყანაში არ გაჩაღდეს მეორე ფრონტი და ის კატასტროფული მდგომარეობა არ მივიღოთ, რაც დღეს უკრაინაშია“, - განაცხადა კალაძემ.

ამასთან, კალაძის განცხადებით, არავის მოსწონს „ეს დესტრუქციული ურთიერთობა ამერიკასთან“.

მისივე თქმით, საქართველოს ხელისუფლება მზად არის მეგობრობისთვის და პარტნიორობისთვის.

„რა თქმა უნდა, მზად ვართ, გავაღრმაოთ ურთიერთობები ევროპასთან, ამერიკის შეერთებულ შტატებთან. არავის მოსწონს ეს დესტრუქციული ურთიერთობა ამერიკასთან. ძალიან დიდი იმედი გვაქვს, ახალი ადმინისტრაცია, თვითონ პრეზიდენტი ტრამპი მოახერხებს დაამარცხოს „დიფ სთეითი“ და გადაიტვირთოს არსებული ურთიერთობები. საქართველოს ხელისუფლება მზად არის მეგობრობისთვის, პარტნიორობისთვის, უამრავი მაგალითი არსებობს რომ კარგი პარტნიორები ვართ“, - აღნიშნა კალაძემ.

ამასთან, ის ესტონეთის საგარეო საქმეთა მინისტრის განცხადებასაც გამოეხმაურა და აღნიშნა, რომ ხელისუფლება გააგრძელებს ქვეყნის ინტერესების დაცვას და „ვერ იხელმძღვანელებს რა მოეწონება და რა არა რომელიღაც გაზულუქებულ ბიუროკრატს ბრიუსელში“.

„საქართველოს ხელისუფლება გააგრძელებს ინტერესების დაცვას, ყველა იმ გადაწყვეტილების მიღებას, რაც ამ ქვეყნისთვის არის საჭირო. ვერ ვიხელმძღვანელებთ, რა მოეწონება და არ არა ბრიუსელში რომელიღაც გაზულუქებულ ბიუროკრატს. ჩვენ ჩვენი ქვეყნის ინტერესებიდან გამოვდივართ“,-აღნიშნა კალაძემ.

კითხვაზე, თუ ვის მოიაზრებს გაზულუქებულ ბიუროკრატებში, კალაძემ აღნიშნა: „ყველა იმ ადამიანს, ვინც საქართველოს წინააღმდეგ აკეთებს არასწორ განცხადებებს, რომელიც სიცრუესა და ტყუილზეა დაფუძნებული“.

ცნობისთვის, ევროპარლამენტში 13 თებერვალს საქართველოს საკითხზე დაგეგმილია რეზოლუციის კენჭისყრა. ტელეკომპანია „ფორმულას“ ინფორმაციით, ევროპარლამენტის რეზოლუციის სამუშაო ვერსიაში “ქართული ოცნების” მაღალჩინოსნების სანქცირებაა მოთხოვნილი. მათ მიერ გავრცელებული ინფორმაციით, დოკუმენტში საუბარია - ბიძინა ივანიშვილის, კახა კალაძის, შალვა პაპუაშვილისა და ირაკლი კობახიძის სანქცირებაზე, ასევე “საქართველოში დემოკრატიულ უკუსვლასა და მედიაგარემოს გაუარესებაზე”. ინფორმაციის თანახმად, დოკუმენტში, ასევე საუბარია “პოლიტპატიმრებზე, მათ შორის “ბათუმელებისა” და “ნეტგაზეთის” ხელმძღვანელის, მზია ამაღლობელის პატიმრობაზეც”. ამასთან, „ტვ პირველის” ინფორმაციით, რეზოლუციაში საქართველოში მოქმედი ბიზნესმენის დასანქცირების საკითხიც დგას. მათი ინფორმაციით, ეს პირები არიან ტელეკომპანია “იმედის” მფლობელი, ირაკლი რუხაძე, საზოგადოებრივი მაუწყებლის დირექტორი, თინა ბერძენიშვილი, ბიზნესმენი სულხან პაპაშვილი, ბიზნესმენი გიორგი კაპანაძე, კომპანია “არქის” დამფუძნებელი, ილია წულაია, ასევე ბიზნესმენი, ვანო ჩხარტიშვილი. გარდა ამისა, მათ მიერ გავრცელებული ინფორმაციის მიხედვით, ბიზნესმენების გარდა სიაში ბიძინა ივანიშვილის ოჯახის წევრებიც არიან.