„ქართული ოცნება“ ლამის ყოველ კვირას ახალ-ახალი საკანონმდებლო ინიციატივებით შემოდის იმისათვის, რომ ახალი წინაღობა შეუქმნას წინააღმდეგობის ტალღას, რომელიც ქვეყანაშია, - ამის შესახებ მოძრაობა „სოციალური დემოკრატიისთვის“ წევრმა ვახუშტი მენაბდემ, „პალიტრანიუსის“ გადაცემა „360 გრადუსი“ „ქართული ოცნების“ ბოლოდროინდელ საკანონმდებლო ინიციატივებზე საუბრისას განაცხადა.

ვახუშტი მენაბდეს მოსაზრებით, მნიშვნელოვანია გავაანალიზოთ ის ინსტრუმენტები, რომელსაც „ქართული ოცნება“ პროტესტის წინააღმდეგ იყენებს, რათა ვიცოდეთ, როგორ დავუპირისპირდეთ მათ.

„ქართულ ოცნებას“ უჭირს, უჭირს წინააღმდეგობის ტალღასთან გამკლავება, რომელიც არის ქვეყანაში. „ქართული ოცნება“ ლამის ყოველ კვირას ახალ- ახალი საკანონმდებლო ინიციატივებით შემოდის იმისათვის, რომ ახალი წინაღობა შეუქმნას წინააღმდეგობის ტალღას, რომელიც ქვეყანაშია. ეს რას გვაჩვენებს ჩვენ? წინა ბარიერი, რომელიც ორი კვირის წინ შექმნა, არ არის საკმარისი და ახალი სჭირდება, რაღაც ახალი უნდა მოიგონოს. ეს სიმპტომია და ეს მნიშვნელოვანია.

მეორე მხრივ, ჩვენ ძალიან კარგად უნდა შევხედოთ და გავაანალიზოთ, რა ინსტრუმენტებია ეს, რასაც იყენებს და რისთვისაც იყენებს. ეს იმიტომ, რომ ვიცოდეთ, როგორ დავუპირისპირდეთ მათ.

ბოლო რამდენიმე დღის განმავლობაში ერთგვარი ინფორმაციული ტალღა იყო ამ საკითხებზე და ბევრი პოლიტიკოსი თუ საჯაროდ მოლაპარაკე ადამიანი ავრცელებდა ინფორმაციას, რომ თითქოს მილიონობით ჯარიმა გამოიწერა მხოლოდ იანვრის განმავლობაში. ეს ინფორმაცია მანიპულაციურია და ეს ჩვენმა მაყურებელმა უნდა იცოდეს. ეს ინფორმაცია არასწორად მოწოდებული და ტაქტიკურად არასწორად გავრცელებული იყო. ასეთმა არასწორად გავრცელებულმა ინფორმაციამ შეიძლება უარყოფითად იმოქმედოს თავად პროცესზე, რომელიც ქუჩაში მიმდინარეობს. სინამდვილეში, საბოლოო გადაწყვეტილება, როცა სასამართლომ პირს დააკისრა ჯარიმის გადახდა, არის სულ რამდენიმე ასეული, ეს არის სამასი საქმე სულ. ანუ დღეში ხუთ ადამიანზე მეტსაც ვერ აჯარიმებს სისტემა“, - განაცხადა ვახუშტი მენაბდემ.