ხელაღებით შეუძლიათ საკუთარ ქვეყანას გადაუარონ 21-ე საუკუნის ორჯონიკიძეებმა, - ამის შესახებ პარლამენტის თავმჯდომარე, შალვა პაპუაშვილმა განაცხადა.

პაპუაშვილის თქმით, თუ რაიმე მტკიცებულება აქვთ საპარლამენტო არჩევნების შესაძლო გაყალბების თაობაზე, პროკურატურაში გამოცხადდნენ და ინფორმაცია მიაწოდონ.

როგორც პაპუაშვილმა აღნიშნა, სალომე ზურაბიშვილი „ცრუპენტელობდა“, როცა არჩევნების გაყალბებაზე საუბრობდა და შემდეგ ჩვენების მისაცემად არც კი მივიდა.

„ყველაფერი ცხადია. ყველა ყალბი ბრალდება, რომელიც მაინც ჯერ კიდევ პრეზიდენტმა სალომე ზურაბიშვილმა იკადრა, შემოიარა მთელი მსოფლიოს ტელევიზიები, ქართველ ხალხს აბრალებდა, რომ აქ თავის ხმას ყიდდა ვიღაც, ვიღაც სხვა ქვეყნის გავლენებით მოქმედებდა და ასე შემდეგ. ეუთო/ოდირის დასკვნამ წერტილი დაუსვა ყველა ამ ბრალდებას. ყველაფერი ტყუილი იყო. ამ ტყუილზე ააწყვეს მთელი თავისი ნარატივი. აგერ არის პროკურატურა და მივიდნენ, თუ რამის თქმა უნდათ. ქალბატონი სალომე რომ ცრუპენტელობდა, მაშინ საქართველოს აბრალებდა სიყალბეს და ასე შემდეგ, არც კი მივიდა პროკურატურაში რომ ჩვენება მიეცა. რატომ? იმიტომ, რომ არაფერი აქვს ამასთან დაკავშირებით. მას ჰკითხეს კიდეც, თუ არ ვცდები CNN-ზე, რომ ამბობთ რუსეთი ჩაერია ამ არჩევნებშიო, რამე მტკიცებულება გაქვთო? არაფერო მაქვსო. ასე უბრალოდ, ხელაღებით შეუძლიათ საკუთარ ქვეყანას გადაუარონ 21-ე საუკუნის ორჯონიკიძეებმა“, - განაცხადა პაპუაშვილმა.