ქობულეთის მერიის ინფორმაციით, მუნიციპალიტეტში დიდთოვლობის გამო, 10-მდე საცხოვრებელი სახლია დაზიანებული, 1000-ზე მეტ ოჯახს კი ელექტროენერგია არ მიეწოდება
ქობულეთის მუნიციპალიტეტში უხვი ნალექის შედეგად 10-მდე საცხოვრებელი სახლი დაზიანდა,- ამის შესახებ “ინტერპრესნიუსს” ქობულეთის
მუნიციპალიტეტის მერიაში განუცხადეს.
უწყების ინფორმაციით, დაზარალებული ოჯახები უსაფრთხო ადგილზე არიან გადაყვანილი.
მათივე თქმით, მუნიციპალიტეტში 1000-ზე მეტი ოჯახი ელექტროენერგიის გარეშეა დარჩენილი.
“შიდა სასოფლო გზები ჯერჯერობით ვერ იწმინდება, ამ ეტაპზე, სოფლის ცენტრამდე მისასვლელი გზა იწმინდება. 10-მდე საცხოვრებელი სახლია დაზიანებული, მოსახლეობა გადაყვანილია უსაფრთხო ადგილზე, ამ ეტაპზე ცენტრალური გზები იწმინდება. ელექტროენერგია ნაწილობრივ აღდგენილია, შუქის გარეშე 1000-ზე მეტი ოჯახია დარჩენილი. პაციენტებს, რომლებსაც დახმარება ესაჭიროებათ, სამაშველო სამსახურთან ერთად ვეხმარებით”, - აცხადებენ მერიაში.
