თუკი ვინმეს ეჭვი ეპარება, რატომ დგანან საქართველოს მოქალაქეები ან რას აკეთებენ საპროტესტო აქციების დროს, ყველას ვეპატიჟები, მოვიდნენ, თავად ნახონ რა ხდება, ნუ ენდობიან ნურცერთ ინფორმაციას! - ამის შესახებ „სამართლიანი არჩევნებისა და დემოკრატიის საერთაშორისო საზოგადოების“ თავმჯდომარემ ნინო დოლიძემ „ინტერპრესნიუსთან“ საუბრისას აღნიშნა, რითაც ის რუსეთის დაზვერვის განცხადებას გამოეხმაურა, სადაც ევროკავშირის მიერ აქციის მონაწილეებისთვის დღეში 120 ევროს გადახდაზეა საუბარი.

როგორც დოლიძემ აღნიშნა, სამწუხაროა, რომ „ქართული ოცნების“ გზავნილები რუსეთის დაზვერვის გზავნილებს ემთხვევა.

„ის, რომ რუსეთი საქართველოში დეზინფორმაციულ გზავნილებს ავრცელებს, ეს არ არის ახალი. ვნახეთ საარჩევნო პერიოდშიც იყო ასეთი განცხადებები. სამწუხარო ის არის, რომ „ქართული ოცნების“ გზავნილები ემთხვევა ხოლმე. რა თქმა უნდა, დაზუსტებით ვერ ვიტყვით, ეს განცხადებები არის თანხვედრაში იმიტომ, რომ შეთანხმებულები არიან თუ უბრალოდ ისინი იმეორებენ. მაგრამ, ფაქტია ერთი, რომ ის ძალიან ხშირ შემთხვევაში, იმეორებს რუსულ ნარატივებს, რაც არის დეზინფორმაციული და აზიანებს საქართველოს და საქართველოს მოსახლეობას. უნდა დავუპირისპიროთ ერთადერთი - სიმართლე. თუკი ვინმეს ეჭვი ეპარება, რატომ დგანან საქართველოს მოქალაქეები ან რას აკეთებენ ისინი გარეთ, საპროტესტო აქციების დროს, ყველას ვეპატიჟები, მოვიდნენ ამ აქციებზე, თავად ნახონ რა ხდება, როგორი გულანთებულები არიან საქართველოს მოქალაქეები ჩვენი უკეთესი მომავლისთვის. მხოლოდ ასე დარწმუნდნენ. ნუ ენდობიან ნურცერთ ინფორმაციას. თავად მოვიდნენ და გაიგონ რეალურად რა ხდება იქ“, - განაცხადა ნინო დოლიძემ.

ცნობისთვის, რუსეთის საგარეო დაზვერვის სამსახურის მიერ გავრცელებული განცხადების მიხედვით, ევროკავშირი მზად არის ქართველ ახალგაზრდებს ფული გადაუხადოს.

„დაგეგმილია ანტისამთავრობო გამოსვლების თითო მონაწილისთვის დღეში 120 ევროს გადახდა,“ - ნათქვამია განცხადებაში.