შოთა რუსთაველის სახელობის თეატრისა და კინოს უნივერსიტეტის სტატუს შეჩერებული სტუდენტის, ლიზა წერეთლის თქმით, 9 სტუდენტისთვის სტატუსის შეჩერების მიზეზი ეთიკის კოდექსის ნორმების დარღვევა გახდა.

როგორც მან “ინტერპრესნიუსთან” განაცხადა, ის სტატუსის შეჩერებას “მათი მოშორების მცდელობას” უკავშირებს.

“დილით, 11:00 საათზე, მომივიდა მეილი, რომელშიც ეწერა, რომ სტუდენტის სტატუსი შემიწყდა. წერილში არაფერი იყო ახსნილ, არც მიზეზი, უბრალოდ ეწერა, რომ ეთიკის კომისიამ გადაწყვიტა, რომ სტატუსი შეგვიწყვიტოს.

სამარცხვინო საქციელი, რასაც ჩვენი ადმინისტრაცია ჩადის, არის ჩვენი მოშორების მცდელობა. ზედმეტად დიდი თავის ტკივილი აღმოვჩნდით, რაც ძალიან მიხარია. გადაწყვიტეს, რომ ეთიკის კოდექს ვარღვევთ, რადგან სხვა ვერაფერი მოიფიქრეს იმისათვის, რომ გაგვაჩუმონ”,- აცხადებს სტუდენტი.

მისივე თქმით, უნივერსიტეტის ადმინისტრაციასთან კომუნიკაცია რამდენჯერმე სცადეს, თუმცა არვინ პასუხობს მათ სატელეფონო ზარებს.

“ადვოკატს დაველაპარაკებით და შემდეგ ნაბიჯებს ერთად გადავწყვეტთ. დანებებას არ ვაპირებთ. არ ვაპირებთ ეს ყველაფერი შევარჩინოთ და ბოლომდე ვიბრძოლებთ. ახლა ჩვენთვის ბრძოლის ახალი ეტაპი იწყება”,- აცხადებს ლიზა წერეთელი.