პალესტინის ჯანდაცვის სამინისტროს ოფიციალური პირების ცნობით, ღაზას სექტორზე ისრაელის მიერ განხორციელებულ საჰაერო დარტყმებს სულ მცირე 100 ადამიანი ემსხვერპლა, - ინფორმაციას Reuters-ი ავრცელებს.

გამოცემის ინფორმაციით, პალესტინის ჯანდაცვის სამინისტროში აცხადებენ, რომ დაღუპულებს შორის ბევრი ბავშვია.

Reuters-ი იუწყება, რომ თავდასხმები ბევრ ადგილას დაფიქსირდა, მათ შორის ჩრდილოეთ ღაზაში მდებარე ქალაქ ღაზასა და დეირ ალ-ბალახში და ღაზას სექტორის ცენტრალურ და სამხრეთ ნაწილში მდებარე ხან იუნისსა და რაფაჰში.

ცნობისთვის, ისრაელმა ღაზას სექტორში ავიაიერიშები დღეს დილით დაიწყო. ისრაელის თავდაცვის ძალებში აცხადებენ, რომ „ჰამასის“ ტერორისტულ ობიექტებს ურტყამენ.