ოპოზიციონერი პოლიტიკოსი ანა დოლიძე სენატორ ქრაქის ტექნოლოგიური დიპლომატიის ინსტიტუტის (The Krach Institute for Tech Diplomacy) მრჩეველთა საბჭოს გამგეობაში აირჩიეს. ამის შესახებ ინფორმაციას სოციალურ ქსელში ანა დოლიძე თავად ავრცელებს.

„მეგობრებო, მოხარული ვარ გაცნობოთ, რომ ამირჩიეს ერთ-ერთი ყველაზე პრესტიჟული ტექნოლოგიური დიპლომატიის ინსტიტუტის მრჩეველთა საბჭოში. მომდევნო თვეებში საზღვარგარეთ გავმართავ შეხვედრებს საბჭოს წევრებთან, რათა გავიზიარო ის გამოცდილება, რაც შეიძლება ჰქონდეს განვითარებულ ქვეყნებს ამ მიმართულებით,“ - წერს ანა დოლიძე.

როგორც დოლიძის მიერ გავრცელებულ ინფორმაციაშია აღნიშნული, სენატორ ქრაქის ტექნოლოგიური დიპლომატიის ინსტიტუტი ტექნოლოგიურ გამოცდილებას, სილიკონ ველის სტრატეგიებს და საგარეო პოლიტიკის ინსტრუმენტებს აერთიანებს.

„მრჩეველთა საბჭო წარმოადგენს მრავალფეროვან გლობალურ საზოგადოებას, რომელშიც სხვადასხვა სამთავრობო უწყებების ყოფილი წევრები, მათ შორის, ყოფილი პრემიერ-მინისტრები, ბიზნესისა თუ აკადემიური ინსტიტუტების წარმომადგენლები შედიან. საბჭოს წევრები ერთად უზრუნველყოფენ ექსპერტიზას, სტრატეგიული მიმართულებების განვითარებას და ადვოკატირებას“, - წერს ანა დოლიძე.