ჩეხეთის პრეზიდენტი პეტრ პაველი უკრაინას ეწვია. ის ოდესაში მაშინ ჩავიდა, როცა ქალაქი რუსეთის მასიური თავდასხმის ქვეშ იყო, - უკრაინული მედიის ცნობით, ამის შესახებ ვიცე-პრემიერი უკრაინის აღდგენის საკითხებში, თემებისა და ტერიტორიების განვითარების მინისტრი ოლექსი კულება „ტელეგრამში“ წერს.

"მოხარული ვარ, მივესალმო ჩეხეთის რესპუბლიკის პრეზიდენტს პეტრ პაველს უკრაინაში. ჩვენ შევხვდით ქალაქ ოდესაში, რომელიც ყოველ ღამით რუსეთის მხრიდან ტერორს განიცდის. სწორედ ჩვენი შეხვედრის დროს რუსეთის ფედერაციამ ქალაქში "შაჰედების" სამი ჯგუფი გამოუშვა. მთელმა ცივილიზებულმა სამყარომ უნდა ნახოს რუსეთის დანაშაულები უკრაინის წინააღმდეგ", - წერს კულება.

მისი თქმით, მხარეებმა განიხილეს უკრაინაში გემების მიმოსვლის უსაფრთხოების, განაღმვის და რეკონსტრუქციის, ასევე საზოგადოების განვითარების ძირითადი საკითხები.

„ჩეხეთი ერთ-ერთი ლიდერია იმ ქვეყნებს შორის, რომლებიც სისტემატურად უწევენ დახმარებას უკრაინას. დიდი ომის სამი წლის განმავლობაში, პარტნიორმა ქვეყანამ უკრაინას 900 მილიონი დოლარის დახმარება გაუწია, ჰუმანიტარული პროგრამებიდან დაწყებული სამხედრო აღჭურვილობით დასრულებული. კერძოდ, ჩეხური სატრანსპორტო საშუალებების ბაზაზე, Tatra-ზე, დამზადებულმა „ნეპტუნის“ ხომალდსაწინააღმდეგო სისტემებმა დიდი წვლილი შეიტანა ზღვაში ჩვენს უსაფრთხოებაში “, - განაცხადა მინისტრმა.