გარდა იმისა, რომ ნოემბრის შემდეგ დაკავებულია და სისხლის სამართლის დევნაა დაწყებული 50-ზე მეტი პირის მიმართ, უნდა გვახსოვდეს, რომ გასულ წელს, „რუსული კანონის“ საწინააღმდეგო აქციების მიმდინარეობისას 19 პირი იქნა დაკავებული. დღეის მდგომარეობით, ყველას მიმართ დადგა გამამტყუნებელი განაჩენი, - ამის შესახებ „საქართველოს ევროპული ორბიტის“ აღმასრულებელმა დირექტორმა, ნინო ლომჯარიამ ბრიფინგზე განაცხადა.

მისივე თქმით, მუდმივად აქვეყნებენ იმ მოსამართლეების და პროკურორების სიას, რომლებიც ჩართულები არიან პოლიტიკურად მოტივირებულ მართლმსაჯულებაში.

„გარდა იმისა, რომ ნოემბრის შემდეგ დაკავებულია და სისხლის სამართლის დევნაა დაწყებული 50-ზე მეტი პირის მიმართ, ჩვენ უნდა გვახსოვდეს, რომ გასულ წელს, „რუსული კანონის“ საწინააღმდეგო აქციების მიმდინარეობისას 19 პირი იქნა დაკავებული. დღეის მდგომარეობით, ყველას მიმართ დადგა გამამტყუნებელი განაჩენი. ჩვენ მიერ შესწავლილი საქმეები ცხადყოფს ერთგვაროვან ტენდენციას, რომ საპროცესო მოქმედებები ამ საქმეებში ჩატარებულია კანონის მოთხოვნათა დარღვევით და უკანონოა. განსაკუთრებით პრობლემატურია ჩხრეკა-ამოღების და ექსპერტიზის საკითხები.

ერთ-ერთი პირი, რომლის მიმართაც დადგა გამამტყუნებელი განაჩენი, შეიწყალა პრეზიდენტმა სალომე ზურაბიშვილმა. უნდა აღინიშნოს, რომ გიორგი ოკმელაშვილის შემთხვევაში და სხვა ბრალდებულების შემთხვევაშიც, ამის შემდგომ მოსამართლის და პროკურატურის მხრიდან კოორდინირებულად მოხდა მათი საქმეების გაჭიანურება, გახანგრძლივდა საქმის განხილვის დრო, რომ დამდგარიყო გამამტყუნებელი განაჩენი მას შემდეგ, როდესაც ზურაბიშვილს გაუვიდოდა საპრეზიდენტო ვადა, რათა აერიდებინათ საპრეზიდენტო შეწყალება მათთვის. ეს ადასტურებს ამ საქმეზე პროკურატურის და სასამართლოს პოლიტიკურ მოტივაციას.

იცით, რომ ვაქვეყნებთ იმ მოსამართლეების და პროკურორების სიას, რომლებიც ჩართულები არიან პოლიტიკურად მოტივირებულ მართლმსაჯულებაში. აღნიშნული სისხლის სამართლის პროკურორია ანი ხუბეჯაშვილი, მოსამართლეები, რომლითაც დააკმაყოფილეს ჩხრეკა ამოღებასთან დაკავშირებით პროკურორის უკანონო და დაუსაბუთებელი შუამდგომლობები არიან დავით მგელიაშვილი, დავით კურტანიძე, თეონა ეპიტაშვილი. მოსამართლე, რომელმაც აღნიშნული საქმე არსებითად განიხილა არის გიორგი გელაშვილი“, - აღნიშნა ლომჯარიამ.