კიშინიოვში დაკავებულმა მოლდოვის ავტონომიური რეგიონის, გაგაუზიის ლიდერმა ევგენია გუცულმა დახმარებისთვის რუსეთის პრეზიდენტს, ვლადიმერ პუტინს მიმართა, - ამის შესახებ ინფორმაციას მოლდოვური მედია ევგენია გუცულის „ტელეგრამის“ არხზე გამოქვეყნებულ განცხადებაზე დაყრდნობით ავრცელებს.

„გაგაუზიის ხალხის სახელით, რომელსაც არასდროს უღალატია თავისი ისტორიული მეგობრებისთვის, მოგმართავთ და მოგიწოდებთ: გამოიყენეთ დიპლომატიური, პოლიტიკური და სამართლებრივი მექანიზმების სრული არსენალი მოლდოვის ხელისუფლებაზე ზეწოლის მიზნით, რათა პოლიტიკური რეპრესიები დაუყოვნებლივ შეწყდეს და ჩემი სწრაფად გათავისუფლება მოხდეს“, - ნათქვამია განცხადებაში.

ასევე, ევგენია გუცული რუსეთის პრეზიდენტს რეგიონის ავტონომიური სტატუსის მხარდაჭერისკენ მოუწოდებს.

„ასევე გთხოვთ თქვენ, როგორც სახელმწიფოს ლიდერს, რომელიც სამართლიანობას ყოველთვის იცავს, დამოუკიდებელი მოლდოვის რესპუბლიკის ფარგლებში გაგაუზიის ავტონომიური სპეციალური სტატუსის მიმართ მტკიცე მხარდაჭერა გამოხატოთ“, - აღნიშნულია განცხადებაში.

შეგახსენებთ, მოლდოვის ავტონომიური რეგიონის, გაგაუზიის ლიდერი, ევგენია გუცული კიშინიოვის აეროპორტში 25 მარტს დააკავეს. მოლდოვაში გუცულის წინააღმდეგ კორუფციის, კერძოდ 2019-2022 წლებში მოლდოვიდან გაქცეული პრორუსი ოლიგარქის, ილან შორის პარტიის რუსეთიდან დაფინანსების საქმეზე სასამართლო საქმეა აღძრული.