რუსულმა ძალებმა ხარკოვზე, დრონების გამოყენებით, მასიური თავდასხმა განახორციელეს, რის შედეგადაც დაიღუპა ორი ადამიანი და დაშავდა - 30.

თავდასხმის შესახებ განახლებულ მონაცემებს საოლქო პროკურატურის წარმომადგენელი, დიმიტრი ჩუბენკო ავრცელებს.

„აფეთქებების შედეგად დაზიანდა 12 მაღალსართულიანი საცხოვრებელი კორპუსი, 24 კერძო საცხოვრებელი სახლი და 13 ავტომობილი“, - აღნიშნა ჩუბენკომ.

ხარკოვის საოლქო-სახელმწიფო ადმინისტრაციის ხელმძღვანელის, ოლეგ სინეგუბოვის ინფორმაციით, რუსებმა „შაჰედის“ ტიპის უპილოტო საფრენი აპარატებით ქალაქის რამდენიმე რაიონს შეუტიეს.

ხარკოვის მერის, იგორ ტერეხოვის განცხადებით, წინასწარი ინფორმაციით, რუსების თავდასხმის შედეგად დაზიანებულ ობიექტებს შორისაა სავაჭრო ცენტრი, მრავალსართულიანი საცხოვრებელი კორპუსები, სამედიცინო დაწესებულება და საოფისე შენობა. მისივე თქმით, დაშავებულებს შორის 5-დან 17 წლამდე ასაკის ხუთი ბავშვია. 15 წლის გოგონა მძიმე მდგომარეობაშია.

ამასთან, ქალაქში მტრის ერთ-ერთი სამიზნე სამხედრო ჰოსპიტალი იყო. უკრაინის შეიარაღებული ძალების გენერალური შტაბის ინფორმაციით, არიან დაშავებულები იმ სამხედროებს შორის, რომლებიც სამედიცინო ცენტრში მკურნალობას გადიოდნენ.