ირანის შეიარაღებულმა ძალებმა, აშშ-ის პრეზიდენტ დონალდ ტრამპის მხრიდან მუქარის ფონზე, რაკეტები მოამზადა, - ინფორმაციას The Tehran Times-ი ავრცელებს.

გამოცემის ცნობით, აღნიშნულ რაკეტებს აშშ-სთან დაკავშირებულ პოზიციებზე თავდასხმის შესაძლებლობა აქვს.

გავრცელებული ინფორმაციით, გაშვებისთვის მზა რაკეტების მნიშვნელოვანი რაოდენობა განლაგებულია ქვეყნის მასშტაბით მდებარე მიწისქვეშა ობიექტებში, რომლებიც საჰაერო თავდასხმებისთვისაა შექმნილი.

შეგახსენებთ, აშშ-ის პრეზიდენტი, დონალდ ტრამპი ირანს დაბომბვითა და მეორადი ტარიფებით დაემუქრა, თუ თეირანი ვაშინგტონთან ბირთვულ პროგრამაზე შეთანხმებას არ მიაღწევს. „თუ ისინი გარიგებას არ დადებენ, იქნება დაბომბვა. ეს იქნება ისეთი დაბომბვა, როგორიც მათ აქამდე არასდროს უნახავთ“, - აღნიშნა ტრამპმა NBC News-თან სატელეფონო ინტერვიუში. მანამდე, ირანმა შეერთებულ შტატებს ომანის მეშვეობით გაუგზავნა პასუხი დონალდ ტრამპის წერილზე, რომელშიც აშშ-ის პრეზიდენტი თეირანს მოუწოდებს, ახალ ბირთვულ შეთანხმებას მიაღწიოს. ირანმა აშშ-ს უპასუხა, რომ მისი პოლიტიკაა, არ ჩაერთოს პირდაპირ მოლაპარაკებებში შეერთებულ შტატებთან „მაქსიმალური ზეწოლის კამპანიისა და სამხედრო მუქარის პირობებში“. ამასთან, ირანის პრეზიდენტმა, მასუდ პეზეშკიანმა გუშინ განაცხადა, რომ თეირანი ვაშინგტონთან პირდაპირ მოლაპარაკებებზე უარს აცხადებს.