„ქართული ოცნების“ განცხადებებში არის ერთი საინტერესო სიახლე, ახლა დაიწყეს აშშ-ზე ისრების გადატანა. ეს კი ნიშანია იმისა, რომ ვერ დალაგდა ის, რასაც ელოდნენ, - ამის შესახებ საქართველოს მე-5 პრეზიდენტმა, სალომე ზურაბიშვილმა დღეს გამართულ ბრიფინგზე განაცხადა.

როგორც ზურაბიშვილმა აღნიშნა, „ქართულ ოცნებას“ აშშ-სთან ურთიერთობების დალაგების უნარი და კომპეტენცია არ აქვს.

„ქართული ოცნების“ განცხადებებში არის ერთი საინტერესო სიახლე, ახლა დაიწყეს აშშ-ზე ისრების გადატანა. ეს კი ნიშანია იმისა, რომ ვერ დალაგდა ის, რასაც ელოდნენ, რადგან ამის უნარი და კომპეტენცია არ აქვთ. აშშ-სთან ვერ დალაგება ნიშნავს, რომ ჩვენ ვერც ერთ პარტნიორთან ვერ გვაქვს საქმე დალაგებული. უფრო და უფრო იზოლაციაში ვართ, ვართ მარტო და დაუცველი ვრჩებით. ამიტომ იძულებულები არიან, რომ ჩინეთს მიმართონ ხან ცენტრალური ბანკით, ანაკლიაზე კი, რა ხდება არ ვიცით...

ის კი ჩანს, რომ ქვეყანა დაუცველია, მეგობრებსა და პარტნიორებს „ქართულმა ოცნებამ“ ზურგი შეაქცია, ეს კი მოქალაქეებს მარტო და დაუცველს ტოვებს“, - განაცხადა სალომე ზურაბიშვილმა.

გარდა ამ საკითხისა, ზურაბიშვილი ბრიფინგზე საზოგადოებრივი მაუწყებლის სამეურვეო საბჭოს ხელმძღვანელის არჩევნებს და ამ პოზიციაზე კვლავ ვასილ მაღლაფერიძის არჩევას გამოეხმაურა. მისი შეფასებით, „ეს არ იყო არჩევნები“. ამასთან, როგორც ზურაბიშვილმა აღნიშნა, ახალი არჩევნების შემდეგ, ხელისუფლებამ საზოგადოებრივი მაუწყებელი ხალხს უნდა დაუბრუნოს.

„დღეს საზოგადოებრივი მაუწყებელი დამონებულ მდგომარეობაშია, რომელიც ერთ პარტიას ემსახურება და იმ პარტიაში რამდენიმე ადამიანს, ეს არ შეიძლება გაგრძელდეს. როგორც კი არჩევნები ჩატარდება და ახალი ხელისუფლება მოვა, პირველ რიგში, ხალხს „საზმაუ“ უნდა დაუბრუნდეს. საზოგადოებრივი მაუწყებელი უნდა იყოს ნეიტრალური, დამოუკიდებელი არხი, რომელიც ადამიანებს ზუსტ ინფორმაციას მიაწვდის, რომ მათ იცოდნენ, თუ რამდენად დაუცველები არიან, თუ რა დონეზეა საფრთხეები და არც პანიკაში უნდა ჩააგდონ ადამიანები, მაგრამ არც რეალობა უნდა დამალონ. ეს ის როლია, რომელსაც დღეს საზოგადოებრივი მაუწყებელი არ ასრულებს“, - განაცხადა სალომე ზურაბიშვილმა.