დიდი ალბათობით, პრეზიდენტთან ერთად, დღესვე წარვადგენთ აჭარის მთავრობის თავმჯდომარის ახალ კანდიდატურას, - ამის შესახებ მთავრობის მეთაურმა, ირაკლი კობახიძემ ჟურნალისტებს განუცხადა.

როგორც მან აღნიშნა, საკითხთან დაკავშირებით მიხეილ ყაველაშვილთან კონსულტაციები მიმდინარეობს.

„ჯერჯერობით ვერ გეტყვით, ყველაფერთან დაკავშირებით გვექნება კონსულტაციები. გუშინაც მქონდა საუბარი თორნიკე რიჟვაძესთან. მან მიიღო ეს გადაწყვეტილება. მინდა მას მადლობა გადავუხადო იმისთვის, რომ ბევრი რამ გაკეთდა აჭარაში გასული წლების განმავლობაში. დიდი ალბათობით, პრეზიდენტთან ერთად, დღესვე წარვადგენთ აჭარის მთავრობის თავმჯდომარის ახალ კანდიდატურას. გვაქვს კონსულტაციები პრეზიდენტთან. მოვლენებს წინ არ გავუსწრებ“, - განაცხადა კობახიძემ.

რაც შეეხება კითხვას, შესაძლებელია თუ არა კვლავ განხორციელდეს გარკვეული საკადრო ცვლილებები, კობახიძემ აღნიშნა, რომ „ზოგადად, რა თქმა უნდა, შესაძლებელია და ამის შესახებ საზოგადოება გაიგებს, როდესაც ამის დრო დადგება“.

„საკადრო ცვლილებები ჩვეულებრივი პროცესია. ზოგადად, რა თქმა უნდა, შესაძლებელია, დანარჩენს საზოგადოება გაიგებს, როდესაც ამის დრო დადგება“, - აღნიშნა კობახიძემ.

ცნობისთვის, დღეს, თორნიკე რიჟვაძემ ავტონომიური რესპუბლიკის მთავრობის თავმჯდომარის პოსტი დატოვა. ამის შესახებ მან სოციალურ ქსელში დაწერა.