ისრაელის პარლამენტის თავმჯდომარესთან შეხვედრის დროს, რა თქმა უნდა, უპირველეს ყოვლისა, უსაფრთხოების გამოწვევებზე ვისაუბრეთ, რომლებიც ჩვენს რეგიონშია, – ამის შესახებ უზბეკეთის დედაქალაქ ტაშკენტში საქართველოს პარლამენტის თავმჯდომარემ შალვა პაპუაშვილმა განაცხადა.

როგორც მან აღნიშნა, ასამბლეის ფარგლებში აქვთ 130 ქვეყნის წარმომადგენელთან შეხვედრის შესაძლებლობა, ასევე, დაგეგმილია ორმხრივი შეხვედრები.

"დღეს შეხვედრა ისრაელის პარლამენტის თავმჯდომარესთან გვქონდა. რა თქმა უნდა, უპირველეს ყოვლისა, უსაფრთხოების გამოწვევებზე ვისაუბრეთ, რომლებიც ჩვენს რეგიონშია. იმ სიტუაციაზე ვისაუბრეთ, რომელიც ისრაელში, ღაზაშია. ამ მხრივ, ჩვენ ყველა ვგულშემატკივრობთ, რომ რაც შეიძლება მალე დაბრუნდნენ გატაცებული ადამიანები სახლში და ის კონფლიქტი მალე დასრულდეს, რომელიც არსებობს.

ისრაელის პარლამენტის სპიკერმა საკუთარი დამოკიდებულება დააფიქსირა ამ საკითხებზე ამერიკის ახალი ადმინისტრაციის განსაკუთრებული მხარდაჭერის ფონზე, რომ ამ საკითხების გადაჭრა შესაძლებელი იქნება. რა თქმა უნდა, მთლიანად რეგიონზე ვისაუბრეთ, უკრაინაში მიმდინარე ომზე. იმაზე, თუ რა გავლენა აქვს ამ უსაფრთხოების გარემოს საქართველოზე და რამდენად მნიშვნელოვანია საქართველოსა და ისრაელს შორის თანამშრომლობა და ურთიერთმხარდაჭერა იმისთვის, რომ უსაფრთხოების საკითხები იყოს მოწესრიგებული. რა თქმა უნდა, ამ მხრივ ასევე ვისაუბრეთ ამერიკის შეერთებული შტატების ახალ ადმინისტრაციასა და ახალ ადმინისტრაციასთან თანამშრომლობაზე, ვისთანაც, როგორც ისრაელის ხელისუფლება, ასევე ჩვენ ვიზიარებთ იმ ხედვებს, რაც ეხება ღირებულებით საკითხებს. ისევე, როგორც ისრაელის ხელისუფლება, ასევე ჩვენც იმ საკითხებზე ვსაუბრობდით, რაზეც დღეს ახალი ადმინისტრაცია არა მხოლოდ საუბრობს, არამედ გადაწყვეტილებებს იღებს გარკვეული მავნე ინსტრუმენტების თუ ინსტიტუტების შეცვლის მხრივ. ამ თვალსაზრისითაც ისრაელის პარლამენტის სპიკერთან საუბარი მქონდა, რომ ორივე ქვეყანას მსგავსი გამოცდილება და მსგავსი კმაყოფილება გვაქვს, რომ სხვა ქვეყნებთან დამოკიდებულების მხრივ ამერიკის ახალი ადმინისტრაციის მიდგომები შეიცვალა და ამას ხედავს როგორც ისრაელის ხელისუფლება, ასევე ჩვენც“, - განაცხადა შალვა პაპუაშვილმა.

საქართველოს პარლამენტის თავმჯდომარე შალვა პაპუაშვილი ისრაელის სახელმწიფოს პარლამენტის - ქნესეთის თავმჯდომარე ამირ ოჰანას შეხვდა. შეხვედრა უზბეკეთის რესპუბლიკის დედაქალაქ ტაშკენტში მიმდინარე საპარლამენტთაშორისო კავშირის 150-ე ასამბლეის ფარგლებში გაიმართა. შეხვედრაზე ისრაელში და ახლო აღმოსავლეთის რეგიონში, ასევე უკრაინაში არსებულ ვითარებასა და მიმდინარე მოვლენებზე ისაუბრეს.