პარლამენტის დროებითი საგამოძიებო კომისიის მდივნის, სოზარ სუბარის ინფორმაციით, კომისიის შემდეგი სხდომა ხვალ, 10:00 საათზე გაიმართება.

მისივე ინფორმაციით, ხვალინდელ სხდომაზე ჯონდი ბაღათურია გამოიკითხება.

როგორც სუბარმა აღნიშნა, მორიგი სხდომის თემა საქართველოს მესამე პრეზიდენტის, მიხეილ სააკაშვილის “ოჯახის მიერ სახელმწიფო ქონებების უკანონო მიტაცება/მითვისებას შეეხება”.

“ხვალ, ანუ სამშაბათს კომისიის მორიგი სხდომა გაიმართება. ხვალ არის პლენარული სხდომა, ამიტომ ჩვენ 12:00 საათამდე, ანუ დილის 10:00 საათიდან უნდა მოვასწროთ სხდომის ჩატარება. რამდენიმე საკითხთან დაკავშირებით მოწვეულია ჯონდი ბაღათურია. საკითხებია: მის მიერ თავის დროზე გაკეთებული გამოძიებები, რომლებიც ეხება სააკაშვილის ოჯახის მიერ სახელმწიფო ქონებების უკანონო მიტაცება/მითვისებას. მთელი ოჯახური კლანი იყო ამ საქმეში ჩართული და ამაზე ჯონდი ბაღათურიაზე უფრო მეტი გამოძიება არავის არ აქვს ჩატარებული. მთელი რიგი დოკუმენტები ჰქონდა თავის დროზე პარლამენტში წარდგენილი. ამავე დროს, ის იცავდა ერთ ადამიანს, რომელსაც საკუთრება წაართვეს და სწორედ მასთან ერთად აპირებს მოსვლას, რომ ეს კონკრეტული საქმეც განვიხილოთ”, - განაცხადა სუბარმა.