ეუთოს გენერალური მდივანი ოფიციალური ვიზიტით არის ჩამოსული. ოპოზიციის დამოკიდებულებას რაც შეეხება, ვფიქრობ, არსებითად საინტერესო არ არის. ჩვენ არ გვყავს ოპოზიცია, რადიკალური დაჯგუფება გვყავს, - ამის შესახებ „ქართული ოცნების“ გენერალურმა მდივანმა, კახა კალაძემ ჟურნალისტებთან საუბრისას განაცხადა.

როგორც კახა კალაძემ აღნიშნა, მისასალმებელია ის ფაქტი, რომ ეუთოს გენერალური მდივანი საქართველოში იმყოფება.

„სამუშაო შეხვედრები მიმდინარეობს, ოფიციალური ვიზიტით არის ჩამოსული. ოპოზიციის დამოკიდებულებას რაც შეეხება, ვფიქრობ, არსებითად საინტერესო არ არის. ჩვენ არ გვყავს ოპოზიცია, რადიკალური დაჯგუფება გვყავს, აგენტურა, ქვეყნის მტრები, რომლებიც დაკავებულები არიან ძირითადად მოღალატეობრივი ქმედებებით, სხვა ქვეყნის ინტერესების გატარებით. იცით, ეუთოს გენერალური მდივანი საგარეო საქმეთა მინისტრს შეხვდა, პარლამენტში გაიმართება შეხვედრა. მისასალმებელია მსგავსი ტიპის ვიზიტები“,-აღნიშნა კალაძემ.

ცნობისთვის, საქართველოს ვიზიტით ევროპის უსაფრთხოებისა და თანამშრომლობის ორგანიზაციის (ეუთო) გენერალური მდივანი, ფერიდუნ სინირლიოღლუ ეწვია.

ფერიდუნ სინირლიოღლუ საქართველოს საგარეო საქმეთა მინისტრს, მაკა ბოჭორიშვილს შეხვდა. ასევე, დაგეგმილია ეუთო-ს გენერალური მდივნის შეხვედრა საქართველოს აღმასრულებელი და საკანონმდებლო ხელისუფლების უმაღლესი თანამდებობის პირებთან.