არაფერს ახალს ივანიშვილი არ იგონებს, ეს შეიძლება ითქვას, რომ არის დიქტატორების სახელმძღვანელო წიგნიდან, რომ შენი კონკურენტები და მეტოქეები გაანადგურო - სახელმწიფო დაფინანსება მოხსნილი გვაქვს და ყველანაირი ზეწოლა მიმდინარეობს ჩვენზე, პრინციპული საკითხია, თუ როდის დამარცხდება ეს სისტემა და არა ის თუ რა რეპრესიულ კანონებს მიიღებს, - ამის შესახებ „ერთიანობა - ნაციონალური მოძრაობის“ გენერალური მდივნის მოადგილე, ირაკლი ფავლენიშვილმა განაცხადა.

მისი შეფასებით, გეგმა ერთია, რომ „სისტემის დემონტაჟი მოხდეს“.

„რეალურად ოპოზიციური პარტიები, რომლებიც ქვეყანაში არსებობს და ბიძინა ივანიშვილს უპირისპირდებიან, მას არ სურს, რომ პოლიტიკურ ველზე არსებობდეს, ამიტომ მისი გადაწყვეტილებაა, რომ ოპოზიციური პარტიები აიკრძალოს. ეს დიქტატორებისთვის ყველაზე მარტივი გამოსავალია, რომ შექმნილ სიტუაციაში აკრძალოს, გაანადგუროს, გააუქმოს, დააპატიმროს და გააძევოს ოპოზიტური პარტიები. არაფერს ახალს ივანიშვილი არ იგონებს, ეს შეიძლება ითქვას, რომ არის დიქტატორების სახელმძღვანელო წიგნიდან, რომ შენი კონკურენტები და მეტოქეები გაანადგურო.

„ნაციონალურ მოძრაობას“ ერთი გეგმა აქვს, რომ იბრძოლოს დიქტატურის წინააღმდეგ ქართველ ხალხთან ერთად, რომ ამ სისტემის დემონტაჟი მოხდეს, სხვა გამოსავალი არ არსებობს. ამ ქვეყანაში საარჩევნო პროცესი ისედაც მკვდარია, ამიტომ „ნაციონალური მოძრაობა“ ეწერება თუ არა ფურცელზე... ისედაც სახელმწიფო დაფინანსება მოხსნილი გვაქვს და ყველანაირი ზეწოლა მიმდინარეობს ჩვენზე. ამიტომ პრინციპული საკითხია, თუ როდის დამარცხდება ეს სისტემა და არა ის თუ რა რეპრესიულ კანონებს მიიღებს სისტემა, აღსასრულამდე“,- განაცხადა ირაკლი ფავლენიშვილმა.

ასევე, ირაკლი ფავლენიშვილმა ყურადღება საქართველოს მე-5 პრეზიდენტის, სალომე ზურაბიშვილის მიერ შექმნილ „წინააღმდეგობის პლატფორმაზეც“ გაამახვილა. მისი თქმით, მიუხედავად იმისა, რომ „ნაციონალური მოძრაობა“ განსხვავებული შეხედულებების გამო, პლატფორმაში ინტეგრირებული არ არის, ბიძინა ივანიშვილის წინააღმდეგ ბრძოლაში მათთან აქტიურად ითანამშრომლებენ.

„რაღაც საკითხებზე ვერ ვთანხმდებით, ყველა ტიპის პლატფორმა ან მოძრაობა, რომელიც ბიძინა ივანიშვილის წინააღმდეგ გარკვეულ წინააღმდეგობაში იქნება ჩართული, ჩვენთვის მისაღებია, უბრალოდ, ამ კონკრეტულ პლატფორმასთან დაკავშირებით ჩვენ, ჩვენი ხედვები გვქონდა, რის გამოც, უბრალოდ არ ვართ ამ პლატფორმის ინტეგრირებული წევრები. ვაპირებთ თანამშრომლობასა და კოორდინაციას ამ პლატფორმასთან და მიგვაჩნია, რომ ქართველი ხალხის ბრძოლა ბიძინა ივანიშვილის დიქტატურის წინააღმდეგ, დიქტატურის დამარცხებით დასრულდება“,- განაცხადა ირაკლი ფავლენიშვილმა.