დღეს უკვე ვადაგასული, აბსოლუტურად ამორტიზებული პოლიტიკოსი რა პლატფორმებს შექმნის, გაერთიანდება თუ არა საკუთარ პოლიტიკურ იდენტობასთან ახლოს მყოფ „ნაცმოძრაობასთან“, ამას არანაირი მნიშვნელობა არ აქვს, - ამის შესახებ საპროცედურო საკითხთა კომიტეტის თავმჯდომარემ, დავით მათიკაშვილმა ჟურნალისტებთან საუბრისას განაცხადა.
მისი თქმით, საქართველოს მეხუთე პრეზიდენტის, სალომე ზურაბიშვილის მიერ შექმნილი „წინააღმდეგობის პლატფორმა“ სრული უტოპიაა.
„საზოგადოებისთვის აქამდეც კარგად იყო ცნობილი, რომ ეს აგენტურული, ქვეყნის ფარგლებს გარედან მომდინარე ქართველთა ხელით შესასრულებელი გეგმები და წიაღსვლები ჩავარდა. ეს წინააღმდეგობის პლატფორმა თუ რაც დაარქვა ამ ქალბატონმა, ერთი მხრივ, სრული აბსურდი და უტოპიაა. მეორე მხრივ, მის წინააღმდეგობაში არის ქალბატონი ზურაბიშვილი. მან ეს პლატფორმა ძალიან დიდი ხანია შექმნა - სამწუხაროდ, ჯერ კიდევ საქართველოს ფორმალურად პრეზიდენტად ყოფნის დროს. ის პირდაპირი გაგებით შევიდა წინააღმდეგობაში ქართველ ხალხთან. იმ ხალხთან, ვინც ის აირჩია. ეს წინააღმდეგობა იმდენად ნათელი და ხაზგასასმელად აშკარა იყო, რომ კითხვის ნიშანი არავის გასჩენია. დღეს უკვე ვადაგასული, აბსოლუტურად ამორტიზებული პოლიტიკოსი რა პლატფორმებს შექმნის, გაერთიანდება თუ არა საკუთარ პოლიტიკურ იდენტობასთან ახლოს მყოფ „ნაცმოძრაობასთან”, ამას არანაირი მნიშვნელობა არ აქვს”, - განაცხადა მათიკაშვილმა.
