რუსეთის პრეზიდენტ ვლადიმერ პუტინის მიერ გამარჯვების დღის აღსანიშნავად გამოცხადებული სამდღიანი ზავი საკმარისი არ არის, უკრაინას სამართლიანი და მდგრადი მშვიდობა სჭირდება, - ამის შესახებ, უკრაინული მედიის ცნობით, იტალიის პრემიერ-მინისტრმა ჯორჯია მელონიმ გამოცემა Corriere della Sera-სთან ინტერვიუში განაცხადა.

მისი თქმით, იტალია მხარს უჭერს აშშ-ის პრეზიდენტ დონალდ ტრამპის ძალისხმევას და მოხარულია, რომ უკრაინის პრეზიდენტმა, ვოლოდიმირ ზელენსკიმ გამოაცხადა მზადყოფნა უპირობო ცეცხლის შეწყვეტისთვის, რითაც აჩვენებს, რომ უკრაინაც მშვიდობისკენ ისწრაფვის.

„ახლა რუსეთმაც იგივე უნდა აჩვენოს. პუტინის მიერ მეორე მსოფლიო ომში გამარჯვების წლისთავისთვის გამოცხადებული სამდღიანი ზავი ხომ სულ სხვა რამ არის და აშკარად არასაკმარისია. მშვიდობა კი სამართლიანი და ხანგრძლივი უნდა იყოს“, - აღნიშნა იტალიის პრემიერმა.