ადამიანების დახმარება საქართველოში დასჯადი ხდება - ეს არის ის, რასაც ივანიშვილის „ქართული ოცნება“ აკეთებს, - ასე ეხმაურება „საერთაშორისო გამჭვირვალობა - საქართველოს“ აღმასრულებელი დირექტორი, ეკა გიგაური რამდენიმე ფონდის ხელმძღვანელის სახლში ჩატარებულ ჩხრეკას.

მისივე თქმით, ფონდები მიმართული იყო კონკრეტულ ადამიანების დახმარებისკენ.

„ვფიქრობთ, რომ ეს არის პოლიტიკურად მოტივირებული. ფაქტობრივად, ადამიანების დახმარება საქართველოში დასჯადი ხდება. ეს არის ის, რასაც აკეთებს ივანიშვილის „ქართული ოცნება“. ის, რომ ჩვენ, ქართველები ერთმანეთს გვერდში ვუდგავართ გასაჭირში, ის რომ ფონდები ეხმარება ბევრ ადამიანს, რომელიც ძალიან რთულ სოციალურ პირობებშია, არ აქვს შესაძლებლობა უმკურნალოს ოჯახის წევრს, დაიქირაოს ადვოკატი. ეს ფონდები მიმართული იყო იქითკენ, რომ დავხმარებოდით კონკრეტულ ადამიანებს. ადამიანების დახმარება დღეს საქართველოში დასჯადი ხდება. ეს არის ის, რასაც ივანიშვილის „ქართული ოცნება“ აკეთებს“, - აღნიშნავს გიგაური.

ცნობისთვის, დღეს, დილას, პროკურატურის წარმომადგენლებმა აქტივისტების - მარიამ ბაჯელიძისა და მარიამ გეგუჩაძის, ასევე, არასამთავრობო ორგანიზაცია „ადამიანის უფლებათა ცენტრის“ ხელმძღვანელის, ალეკო ცქიტიშვილის საცხოვრებელ ბინები გაჩხრიკეს. უწყება ამ დრომდე ატარებს ჩხრეკას „ნანუკას ფონდის“ დამფუძნებლის, ნანუკა ჟორჟოლიანის სახლში.

პროკურატურის ცნობით, საქმე ეხება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების, საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტებზე მიმდინარე გამოძიებას.