თბილისის საქალაქო სასამართლოში პარლამენტთან მიმდინარე საპროტესტო აქციის დროს დაკავებულების - დავით ლომიძისა და თემურ ზასოხაშვილის სასამართლო პროცესი მიმდინარეობს.

დაკავებულებს განსაკუთრებულ დავალებათა დეპარტამენტის თანამშრომლებზე თავდასხმასა და ე.წ. მოლოტოვის კოქტეილების სროლას ედავებიან.

სხდომას მხოლოდ თემურ ზასოხაშვილი ესწრება. რაც შეეხება დავით ლომიძეს, როგორც მოსამართლე ნინო გალუსტაშვილმა პენიტენციური დაწესებულებიდან წარმოდგენილი ოქმიდან წაიკითხა, ის სხდომაზე დასწრებაზე უარს აცხადებდა, თუმცა, მიზეზი მითითებული არ იყო.

ლომიძის ადვოკატის განმარტებით, ბრალდებულისთვის ჩატარებული ქირურგიული ოპერაციის გამო, მას ექიმები დიდი ხნით ჯდომის, ასევე ფეხზე დგომის რეკომენდაციას არ აძლევენ.

დღევანდელ პროცესზე პროკურატურის სამ მოწმეს - ექსპერტს და ორ გამომძიებელს დაკითხავენ.

ცნობისთვის, დავით ლომიძე და თემურ ზასოხაშვილი 2024 წლის 1-ელ დეკემბერს დააკავეს. პროკურატურის ინფორმაციით, ისინი ღამის საათებში, თბილისში, პარლამენტთან მიმდინარე საპროტესტო აქციის დროს, ჭიჭინაძის ქუჩაზე თავს დაესხნენ განსაკუთრებულ დავალებათა დეპარტამენტის თანამშრომლებს და მათ ე.წ. „მოლოტოვის კოქტეილები“ ესროლეს. ასევე, აღნიშნული ქმედების შედეგად ცეცხლი წაეკიდა შინაგან საქმეთა სამინისტროს ბალანსზე არსებულ წყლის ჭავლის სპეციალურ ავტომანქანას.

მათ ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა პოლიციელის სამსახურებრივ საქმიანობასთან დაკავშირებით) წარედგინათ, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.