საქართველოს საბანკო ასოციაცია „ევროპის სახალხო პარტიის“ (EPP) რეზოლუციის რეკომენდაციებს ეხმაურება და აცხადებს, რომ ეს დოკუმენტი პოლიტიკური შინაარსისაა და „არ შეიძლება გახდეს ბანკის მიმართ მოქმედების სამართლებრივი ან რეგულაციური საფუძველი“.

განცხადებაში ნათქვამია, რომ საუბარი „ქართუს“ სვიფტ სისტემიდან გამოთიშვაზე არ შეესაბამება რეალობას.

„საქართველოს საბანკო ასოციაცია ეხმაურება გავრცელებულ ინფორმაციას, რომელიც ასოციაციის წევრ „ქართუ ბანკს“ და „ევროპის სახალხო პარტიის“ (EPP) რეზოლუციის რეკომენდაციებს შეეხება, მათ შორის მოწოდებას „ქართუ ბანკის“ სვიფტ სისტემიდან გამოთიშვის შესახებ.

გვსურს, ხაზგასმით აღვნიშნოთ, რომ მოცემული რეზოლუცია წარმოადგენს პოლიტიკური შინაარსის დოკუმენტს და ის არ შეიძლება გახდეს ბანკის მიმართ მოქმედების სამართლებრივი ან რეგულაციური საფუძველი, საუბარი „ქართუს“ SWIFT სისტემიდან გამოთიშვაზე არ შეესაბამება რეალობას.

„ქართუ ბანკი“ საერთაშორისო საფინანსო სისტემის ნაწილია და იცავს როგორც საქართველოში მოქმედ კანონმდებლობას, ასევე საერთაშორისო რეგულაციებს.

აღნიშნული ფაქტის საფუძველზე პროგნოზების და ინტერპრეტაციების გავრცელებამ ადგილობრივი აქტორების და მედიის მიერ შესაძლოა ხელი შეუშალოს საზოგადოების მიერ რეალური სურათის აღქმას და გამოიწვიოს ბანკის ფინანსური ზიანი.“- ნათქვამია განცხადებაში.

ცნობისთვის, „ევროპის სახალხო პარტიამ“ საქართველოსთან დაკავშირებით რეზოლუცია მიიღო, სადაც სხვა საკითხებთან ერთად, არის მოწოდება „ახალი არჩევნების ჩატარებაზე, პოლიტპატიმრების გათავისუფლებასა და ივანიშვილისა და მასთან დაკავშირებული ბიზნესების დასანქცირებაზე“. რეზოლუციაში ასევე საუბარია „ქართუ ბანკის“ SWIFT და Visa/MasterCard ქსელებიდან გათიშვის მოწოდებაზეც.