,,წინააღმდეგობის პლატფორმამ“ საქართველოს მეგობართა საერთაშორისო ჯგუფთან დისტანციური შეხვედრა გამართა, სადაც საქართველოს მეხუთე პრეზიდენტმა სალომე ზურაბიშვილმა და პლატფორმის წევრებმა ქვეყანაში არსებულ ვითარებასა და პოლიტიკურ კრიზისთან დაკავშირებით ისაუბრეს. ამის შესახებ ინფორმაციას საქართველოს მეხუთე პრეზიდენტის, სალომე ზურაბიშვილის პრესსამსახური ავრცელებს.

სალომე ზურაბიშვილმა საქართველოს მეგობართა ჯგუფს ,,წინააღმდეგობის პლატფორმის“ მონაწილეები წარუდგინა, მისი მიზნები და მუშაობის ფორმატი გააცნო.

დისტანციურ შეხვედრას ესწრებოდნენ: ევროპარლამენტარები, ევროპის ქვეყნების ეროვნული პარლამენტების წარმომადგენლები, აშშ-ს კონგრესისა და საერთაშორისო ორგანიზაციის წარმომადგენელი.

„წარვუდგინეთ ახალი პლატფორმა, „წინააღმდეგობის პლატფორმა“, მისი მიზნები, მოქმედების და მუშაობის მთავარი წესები, ჩვენი მუშაობის მთავარი პრინციპები. ასევე, ის, რომ დაფუძნებულია ქართულ ქარტიაზე და ჩვენი ერთობლივი და პირველი მიზანია ახალი არჩევნები, ასევე პატიმრების გათავისუფლება.

ეს პლატფორმა უკვე სხვებთან ერთადაც მუშაობს. პროტესტის მონაწილეებთან, არასამთავრობო ორგანიზაციებთან, კულტურის ორგანიზაციებთან ერთად ვგეგმავთ 26 მაისს და ჩვენ ასევე მოვიწვიეთ ჩვენი მეგობრები 26 მაისზე, რომ ქართველ ხალთან ერთად თვითონ გამოხატონ სოლიდარობა.

ჩვენ ასევე აღვწერეთ დღევანდელი პოლიტიკური მდგომარეობა, რაზედაც თვითონაც არიან ძალიან კარგად გათვითცნობიერებული, მაგრამ ბოლო გადაწყვეტილებები რაც მიღებულიო იქნა, თუნდაც მედიის შესახებ, რომელსაც „ქართული ოცნება“ ასაღებს, რომ ბრიტანულ კანონმდებლობასთან არის მიახლოებული, ეს ყველაფერი არის მათი ჩვეულებრივი ფორმა, რითაც ასაღებენ რუსულ კანონებს, როგორც ხან ბრიტანულს, ხან ამერიკულს, მაგრამ ყველასთვის გასაგებია, რომ ეს არის რეპრესიის გაგრძელება და ამას ჭირდება კიდევ მეტი რეაგირება ევროპელი მეგობრებისგან.

ამ შეხვედრას ესწრებოდა ჯო უილსონის სტაფერი, რომელმაც მოგვახსენა ბოლო მოვლენები და მეგობარი აქტის დღეს განხილვა საღამოს ექვს საათზე აშშ-ში“, - განაცხადა სალომე ზურაბიშვილმა.