კოშმარი ის ძალაა, საიდანაც ე.წ. ლობისტები და ვითომ დემოკრატიის სახელით მოსაუბრე, დიქტატის დამამყარებელი ხელისუფალნი თუ ბიუროკრატები იმართებიან! როცა კოშმარზე საუბრობენ, ამის მორალური უფლება უნდა ჰქონდეთ! - ასე გამოეხმაურა ფრაქცია "ქართული ოცნების" წარმომადგენელი ირაკლი კირცხალია აშშ-ის კონგრესის წარმომადგენელთა პალატის მიერ “MEGOBARI აქტის“ მხარდაჭერას.

კირცხალიას შეფასებით, კანონპროექტის სახელწოდება - „MEGOBARI აქტი“ საქართველოსა და ქართული საზოგადოებისთვის შეურაცხმყოფელია.

აქვე კირცხალიამ აღნიშნა, რომ წინ სენატის მოსმენაა, შემდეგ პროექტს აშშ-ს პრეზიდენტმა ხელი უნდა მოაწეროს და „ძალიან მალე გამოჩნდება, რამდენად მიჰყვება ტრამპი მისი მიერვე გაცხადებულ პოლიტიკურ კურსს“.

„MEGOBARI აქტის“ სათაურიც შეურაცხმყოფელია ჩვენი ქვეყნისა და საზოგადოებისთვის. რაც შეეხება ამ აქტის ისტორიას, თუ საიდან შეიქმნა, რომელი კომისიები გაიარა, ვინ იყო საქართველოდან წარმომადგენელი და ე.წ. ცრუ დამსმენი საკუთარი სახელმწიფოს წინააღმდეგ. შემდეგ ის სახელები და გვარები, ლობისტური ჯგუფები, რომლებიც კოლექტიურ „ნაცმოძრაობას" ლობირებენ - ვნახეთ, რომ ეს ყველაფერი რაღაც ეტაპამდე მივიდა.

დაველოდოთ, რა განვითარება მოჰყვება. წინ სენატია, შემდეგ პრეზიდენტმა ხელი უნდა მოაწეროს. ვნახოთ, აშშ-ის პრეზიდენტი და მისი ადმინისტრაცია როგორ და რა ძალისხმევით მიჰყვება მის მიერ გაცხადებულ პოლიტიკას. ეს ძალიან მალე გამოჩნდება!" - განაცხადა ირაკლი კირცხალიამ.