9 მაისთან დაკავშირებით ცეცხლის შეწყვეტის შესახებ ვლადიმერ პუტინის ინიციატივა ძალაში რჩება, - ამის შესახებ კრემლის პრესსპიკერმა, დიმიტრი პესკოვმა ბრიფინგზე განაცხადა.

„დიახ, რუსული მხარის, პრეზიდენტ პუტინის ინიციატივა ძალაში რჩება“, - განაცხადა პესკოვმა.

ამასთან, მისი თქმით, 9 მაისს უსაფრთხოების უზრუნველყოფის მიზნით რუსეთის სპეცსამსახურები ყველა საჭირო ზომას იღებენ.

„ჩვენი სპეცსამსახურები და სამხედროები ყველა საჭირო ზომას იღებენ იმისთვის, რომ გამარჯვების დღე მშვიდ, სტაბილურ და მშვიდობიან ატმოსფეროში აღინიშნოს“, - აღნიშნა კრემლის პრესსპიკერმა.

შეგახსენებთ, რამდენიმე დღის წინ რუსეთის პრეზიდენტმა, ვლადიმერ პუტინმა მეორე მსოფლიო ომში გამარჯვების 80-ე წლისთავთან დაკავშირებით უკრაინაში ცეცხლის შეწყვეტა გამოაცხადა, რომელიც, მისი თქმით, 8-10 მაისს იმოქმედებს.