არ ვიცი, ვლადიმერ პუტინი უკრაინასთან მოლაპარაკებებისთვის თურქეთში ჩავა თუ არა, - ამის შესახებ აშშ-ის პრეზიდენტმა, დონალდ ტრამპმა ჟურნალისტებს თვითმფრინავის ბორტზე განუცხადა.

„არ ვიცი, ის [ვლადიმერ პუტინი] იქნება თუ არა იქ. ვიცი, სურს, რომ იქ ვიყო და ეს შესაძლებელია. არ ვიცი იქნება თუ არა ის იქ, თუ მეც არ ჩავალ. თუ ჩვენ ომის დასრულებას შევძლებთ, მაშინ ამის შესახებ [თურქეთში ვიზიტი] ვიფიქრებ, მაგრამ ხვალინდელი დღე სრულიად დაკავებული გვაქვს. ძალიან დატვირთული გრაფიკი გვაქვს, მაგრამ ეს არ ნიშნავს იმას, რომ ადამიანების სიცოცხლის გადასარჩენად იქ არ წავიდოდი“, - განაცხადა დონალდ ტრამპმა.

ამასთან, მისი თქმით, რუსეთისა და ირანის წინააღმდეგ მეორადი სანქციების დაწესებას არ გამორიცხავს.

„წინასწარ ამის შესახებ საუბარი არ მსურს, მაგრამ მე მეორადი სანქციების დაწესების შესაძლებლობას ყოველთვის განვიხილავ“, - აღნიშნა აშშ-ის პრეზიდენტმა.