ადვოკატი - წარმოდგენილი მოწმეების ჩვენებები კიდევ უფრო მეტად ადასტურებს იმას, რომ ზვიად ცეცხლაძე წარდგენილ ბრალდებაში უდანაშაულოა

წარმოდგენილი მოწმეების ჩვენებები კიდევ უფრო მეტად ადასტურებს იმას, რომ ზვიად ცეცხლაძე წარდგენილ ბრალდებაში უდანაშაულოა, - ამის შესახებ ჯგუფურ ძალადობაში მონაწილეობისა და მისი ორგანიზების ბრალდებით დაკავებული ზვიად ცეცხლაძის ადვოკატმა დავით ჭიკაიძემ განაცხადა.

ადვოკატის თქმით, მოწმეები არ იცნობენ ზვიად ცეცხლაძეს ისევე, როგორც დანარჩენ არცერთ ბრალდებულს და მათ ვერ დაადასტურეს, რომ ამ კონკრეტული პირების მიერ მიიღეს ზიანი.

„დღეს წარმოდგენილმა ყველა დაზარალებულად ცნობილმა პოლიციელმა დასმულ კითხვაზე უპასუხა, რომ მათთვის არ არის ცნობილი ვისი მხრიდან მოხდა იმ ნივთის გასროლა, რომელმაც შედეგად გამოიწვია მათი დაზიანება. დასმულ კითხვაზე, ზვიად ცეცხლაძის ბრალად წარდგენილი ქმედების შედეგად, მისი მხრიდან თუ გაკეთდა ორგანიზება, რომ ამ ჯგუფს მიზნად ჰქონდა დასახული სხვა პირების მიმართ ზიანის მიყენების ფაქტი, ადასტურებენ თუ არა, რომ ზვიადისგან დაორგანიზებული ჯგუფისგან მიიღეს დაზიანება, ამ მოწმეებმა განაცხადეს, რომ მათთვის ეს არ არის ცნობილი. ისინი არ იცნობენ ზვიად ცეცხლაძეს ისევე, როგორც დანარჩენ არცერთ ბრალდებულს. მათ ვერ დაადასტურეს, რომ ამ კონკრეტული პირების მიერ მიიღეს ზიანი. შესაბამისად მიგვაჩნია, რომ წარმოდგენილი მოწმეების ჩვენებები კიდევ უფრო მეტად ადასტურებს იმას, რომ ზვიად ცეცხლაძე წარდგენილ ბრალდებაში უდანაშაულოა“, - განაცხადა დავით ჭიკაიძემ.