ვოლოდიმირ ზელენსკი დღეს რეჯეფ თაიფ ერდოღანს შეხვდება, - ამის შესახებ ინფორმაციას სააგენტო „ფრანს-პრესი“ უკრაინელ ოფიციალურ პირზე დაყრდნობით ავრცელებს.

„ფრანს-პრესის“ ცნობით, რუსეთთან დღეს დაგეგმილი მოლაპარაკებების შესახებ გადაწყვეტილებას უკრაინის პრეზიდენტი, ვოლოდიმირ ზელენსკი თურქეთის პრეზიდენტთან, რეჯეფ თაიფ ერდოღანთან შეხვედრის შემდეგ მიიღებს.

„პრეზიდენტი თავის ვიზიტს ანკარაში ერდოღანთან იწყებს და მხოლოდ ამის შემდეგ მიიღებს შემდგომი ნაბიჯების შესახებ გადაწყვეტილებას“, - განუცხადა სააგენტოს წყარომ.

შეგახსენებთ, დღეს სტამბოლში უკრაინასა და რუსეთს შორის მოლაპარაკებებია დაგეგმილი.

უკრაინის დელეგაციის შემადგენლობაში შედიან: პრეზიდენტი ვოლოდიმირ ზელენსკი, საგარეო საქმეთა მინისტრი ანდრეი სიბიგა, თავდაცვის მინისტრი რუსტემ უმეროვი, პრეზიდენტის ადმინისტრაციის ხელმძღვანელი ანდრეი ერმაკი და ვოლოდიმირ ზელენსკის მრჩეველი დიპლომატიურ საკითხებში იგორ ჟოვკვა.