რევაზ კიკნაძის ადვოკატი მოსამართლეს - თქვენ არც ერთ ჩემს შუამდგომლობას არ აკმაყოფილებთ, მაგრამ სტრასბურგის სასამართლოსთვის დარღვევებს გიგროვებთ
თქვენ არც ერთ ჩემს შუამდგომლობას არ აკმაყოფილებთ, მაგრამ სტრასბურგის სასამართლოსთვის დარღვევებს გიგროვებთ, - ამ სიტყვებით ჯგუფურ ძალადობაში მონაწილეობის ბრალდებით დაკავებულ რევაზ კიკნაძის ადვოკატმა ელგუჯა ავსაჯანიშვილმა მოსამართლე ნინო გალუსტაშვილს მიმართა.
ადვოკატმა სასამართლოში შუამდგომლობა დააყენა მოწმე პოლიციელის ილია ბუიღლიშვილის მობილური ტელეფონიდან ინფორმაციის, კერძოდ კი, თავად სამართალდამცავის მიერ მითითებული ფოტოსურათის გამოთხოვასთან დაკავშირებით.
ავსაჯანიშვილის თქმით, პოლიციელის ჩვენებით დგინდება, რომ მის ტელეფონში ინახება ფოტოსურათი და ინფორმაცია, რომელიც საქმესთან შემხებლობაშია, რაც გამოთხოვილი უნდა იყოს.
საუბარია, დაზარალებულის მიერ გაჟღერებულ ინფორმაციაზე, რომლის მიხედვითაც, მას მობილურ ტელეფონში აქვს ფოტოსურათი, რომელიც აქციაზე მიღებულ მის დაზიანებებს ასახავდა.
პროკურორები ამ შუამდგომლობას არ დაეთანხმნენ არგუმენტით, რომ ის დაუსაბუთებელია.
მოსამართლე ნინო გალუსტაშვილმა შუამდგომლობა არ დააკმაყოფილა.
ცნობისთვის, პარლამენტთან მიმდინარე საპროტესტო აქციების დროს, ჯგუფურ ძალადობაში მონაწილეობის ბრალდებით 11 პირი დააკავეს.
დაკავებულებს - ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კიკნაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.
აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.
v-if="article.gallery" v-html="article.gallery"
