საქართველოს სტატისტიკის ეროვნული სამსახურის ინფორმაციით, 2025 წლის I კვარტალში საქართველოს ნავსადგურებში და ტერმინალებში შემოვიდა 451 გემი, რომელთა 50.1% იყო გენერალური (ზოგადი სახის) ტვირთის გადამზიდი, 22.2%— თხევადი ტვირთმზიდი, 18.2 % — კონტეინერმზიდი, ხოლო დანარჩენი 9.5 % ნაყარ ტვირთმზიდებზე და სპეციალიზებულ გემებზე განაწილდა.

როგორც „საქსტატის“ მიერ გავრცელებულ ინფორმაციაშია ნათქვამი, 2025 წლის I კვარტალში წინა წლის შესაბამის პერიოდთან შედარებით, საქართველოს ნავსადგურებმა და ტერმინალებმა 2.6-ჯერ მეტი სპეციალიზებული გემი მიიღო, 32.2 %-ით მეტი — გენერალური (ზოგადი სახის) ტვირთმზიდი, 12.8 %-ით ნაკლები — კონტეინერმზიდი და 11.5 % -ით ნაკლები — თხევადი ტვირთმზიდი.

„2025 წლის I კვარტალში საქართველოს ნავსადგურებში და ტერმინალებში შემოსული გემების 18.2 % პანამის დროშის ქვეშ დაცურავს, 16.6 %— თურქეთის, 10.2 % — მალტის, 8.4 % — ლიბერიის, დანარჩენი 46.6 % კი სხვა ქვეყნებზე განაწილდა. 2025 წლის I კვარტალში საქართველოს ნავსადგურები 2.1 ათას მგზავრს მოემსახურა, რაც 16.5 %-ით მეტია წინა წლის შესაბამისი პერიოდის მაჩვენებელზე. ამასთან, მგზავრთა ნაკადში გასული მგზავრების წილი აღემატებოდა შემოსული მგზავრების წილს და 56.8 %-ს შეადგენდა. 2025 წლის I კვარტალში საქართველოს ნავსადგურებმა და ტერმინალებმა 3 709.0 ათასი ტონა ტვირთი გადაამუშავა, რაც 9.2 %-ით მეტია წინა წლის შესაბამისი პერიოდის მაჩვენებელზე. გადამუშავებული ტვირთის 52.5 % გენერალური (ზოგადი სახის) ტვირთი იყო, 28.8 %— თხევადი ტვირთი, ხოლო 18.7 %— ნაყარი ტვირთი“,- ნათქვამია ინფორმაციაში.