გილოცავთ საქართველოს დამოუკიდებლობის დღეს, - ამის შესახებ ესტონეთის პარლამენტის საგარეო საქმეთა კომიტეტის თავმჯდომარე, მარკო მიხელსონი X-ის საკუთარ გვერდზე წერს და ვიდეომიმართვას ავრცელებს.

„თავისუფლებისმოყვარე საქართველოს ხალხს! ამ უმნიშვნელოვანეს დღეს, საქართველოს დამოუკიდებლობის დღეს, ჩვენ თქვენთან ერთად დიდი აღტაცებითა და ურყევი სოლიდარობით ვდგავართ. თქვენ ამაყი ტრადიციების შთამომავლები ხართ, იმ მიწის დამცველები, სადაც მდინარეებში სიმამაცე მოედინება და მთებში წინააღმდეგობის ხმა გაისმის. ტირანიისა და უსამართლობის წინააღმდეგ თქვენ აღსდექით, როგორც ძლიერი, ამაყი და ერთიანი. დაე, დღეს თქვენი დროშა მაღლა აფრიალდეს, როგორც თქვენი მტკიცე ნების, მშვიდობის სიყვარულისა და თავისუფალი, დემოკრატიული და ევროპული საქართველოს მიმართ ურყევი ერთგულების სიმბოლო. დიდება საქართველოს, თავისუფალსა და ამაყს!“, - წერს მარკო მიხელსონი.

მისი თქმით, ქართველი ხალხი მსოფლიოს შეახსენებს, თუ რას ნიშნავს თავისუფლების სიყვარული.

„თქვენ ზეწოლის, დაშინებისა და უცხოური ჩარევის წინაშე მტკიცედ დგახართ. თქვენ დემოკრატიას, თავისუფლებასა და ევროპულ მომავალს იცავთ. მარტო არ ხართ. განაგრძეთ ბრძოლა ქართული სულისთვის, სამართლიანობისთვის, თავისუფლებისა და თავისუფალი მომავლისთვის. გილოცავთ საქართველოს დამოუკიდებლობის დღეს“, - აცხადებს ესტონეთის პარლამენტის საგარეო საქმეთა კომიტეტის თავმჯდომარე.