ბიძინა ივანიშვილი - მხოლოდ ჩემთან შეხვედრის მოთხოვნას ერთადერთი ახსნა აქვს, რომ ამგვარ შეხვედრას მხოლოდ პირადი შანტაჟის ფონზე აქვს ფასი

მხოლოდ ჩემთან შეხვედრის მოთხოვნას ერთადერთი ახსნა აქვს, რომ ამგვარ შეხვედრას მხოლოდ პირადი შანტაჟის ფონზე აქვს ფასი, - ამას “ქართული ოცნების“ საპატიო თავმჯდომარე ბიძინა ივანიშვილი სპეციალურ განცხადებაში წერს, რითაც საქართველოში აშშ-ს საელჩოს განცხადებას ეხმაურება.

ივანიშვილი ამავე წერილში ხაზგასმით აღნიშნავს, რომ მმართველ პარტიაში არცერთი პრინციპული გადაწყვეტილება გუნდის და პრემიერ-მინისტრის ჩართულობის გარეშე არ მიიღება.

„შეიძლება მათ თქვან, რომ მე, როგორც მმართველი პარტიის დამფუძნებელს და საპატიო თავმჯდომარეს, მაქვს განსაკუთრებული გავლენა გადაწყვეტილებების მიღებაზე, თუმცა ამასთან დაკავშირებით, მინდა დაგარწმუნოთ, რომ მმართველ პარტიაში არცერთი პრინციპული გადაწყვეტილება არ მიიღება გუნდის და მით უმეტეს, პრემიერ-მინისტრის ჩართულობის გარეშე. აქედან გამომდინარე, მხოლოდ ჩემთან შეხვედრის მოთხოვნას აქვს ერთადერთი ახსნა, რომ ამგვარ შეხვედრას მხოლოდ პირადი შანტაჟის ფონზე აქვს ფასი.

იმედი მაქვს, ამერიკის საელჩო დადებითად უპასუხებს საქართველოს მთავრობის შეთავაზებას ქართულ-ამერიკული სტრატეგიული პარტნიორობის სუფთა ფურცლიდან და კონკრეტული გზამკვლევით განახლების შესახებ. საქართველოს ხელისუფლების თითოეული ლიდერი გამოთქვამს სრულ მზადყოფნას, ამერიკული მხარის რეალური დაინტერესების შემთხვევაში, აქტიურად ჩაერთოს ქართულ-ამერიკული ურთიერთობების გადატვირთვის პროცესში“, - ნათქვამია ბიძინა ივანიშვილის განცხადებაში.